كود هناء ابو علي كازا ///
البارح خرجات رسالة گالو راها ديال “جيل Z وجهوها لرئيس الدولة الملك محمد السادس. فيها 4 المطالب منها “إقالة الحكومة الحالية” و”إعلان مسار قضائي لتجريم الفاسدين” و”حل الأحزاب السياسية المتورطة في الفساد” وتفعيل مبدأ المساواة وعدم التمييز” و”تعزيز حرية التعبير والحق في الاحتجاج السلمي و” إطلاق سراح جميع المعتقلين المرتبطين بالاحتجاجات السلمية” “الإفراج عن كافة معتقلي الرأي والانتفاضات الشعبية والحركات الطلابية” و”جلسة وطنية علنية للمساءلة”.
فهاد الرسالة قالو هادو اللي قدمو ريوسهم على الجيل اللي دار الاحتجاجات باللي هما “شباب المغرب المعاصر نرفع رسالة وطن، الذين يتألمون من الواقع المعيشي الصعب، ومن الهوة بين الحقوق الدستورية المنصوص عليها وبين الممارسات اليومية، نتوجه إليكم بهذه الوثيقة الشعبية المليئة بالأمل والإيمان بأن مجلس العرش سيظل سيفاً لأمن الوطن واستقرار شعبه وضمان كرامته” وباللي هما جيل “يرفض الاستمرار في دوامة الفساد والفشل، ويؤمن بأن مستقبل المغرب يمر عبر تجاوز هذه المؤسسات العاجزة، وإعادة بناء الثقة بين الشعب والدولة على أساس المحاسبة، العدالة الاجتماعية، وضمان الحقوق والحريات”.
“كود” سولات احد النشطاء اللي شارك ف20 فبراير ومتبع بزاف هاد الحراك، الناشط ما بغات يقول اسمو قال ل”كود” باللي هاديك الرسالة مكتوبة بطريقة ماشي ديال شباب الحركة وباللي ما كتعكسش النقاشات اللي كاينة ولا المطالب اللي حدداتها الحركة.
مصدر “كود” قال باللي ما عمر مطلب “استقالة الحكومة” او اقالتها كانت من مطالب الحركة وباللي الشعارات اللي خرجات بطريقة غريبة ضد اخنوش البارخ ماشي من ثقافة الحركة. المصدر قال ل”كود” باللي كاينة شي جهات فالدولة عينها فاخنوش واستغلت هاد الحركة اللي ما معروفش فيها الراس باش ضربو وصافي
مصدر “كود” قال باللي الجواب على هاد الرسالة هو استمرار الاحتجاجات هاد العشية اليوم الجمعة 3 اكتوبر 2025 وبالي كون كانت تعبر على تفكير هاد الشباب هو علقو المشاركة فالاحتجاجات.
المصدر قال ل”كود” باللي الشباب عندهم مطالب رفعوها النهار الاول وما تبدلاتش. هاد الشي اكدو منشور ديال هاد الجيل. قال فيه باللي هاديك المطالب ماشي هي المطالب الرسمية وغير “عينة اولى”