كود سبور//
خداو الوداد الرياضي صدارة البطولة الاحترافية، أما الرجاء الرياضي ضيعوها من بين يديهم، وهذا الشي قبل الديربي فـ الدورة 5 اللي جايا.
اليوم الخميس قدرو الوداد الرياضي يربحو النادي المكناسي برسم الدورة 4، بنتيجة 3-1 فتيران مكناس، وماركا للوداد الهدف الاول والثاني كل من باكاسو فـ الدقيقة 5، ولورش فـ الدقيقة 35، والكوديم قلص لهم الفارق عدنا بالرداد فـ الدقيقة 38، وحمزة هنوري ماركا الهدف الثالث للوداد فـ الدقيقة 80.
وبالمقابل وفـ نفس اليوم وعن نفس الدورة، ما قدروش الرجاء الرياضي يحافظو على هدف التقدم اللي كانو رابحين به المغرب الفاسي، واللي ماركاه للخضرا عمر النجاري فـ الدقيقة 76، ونجح الماص فـ تسجيل التعادل فـ الدقيقة الأخيرة بواسطة الرجاوي السابق سفيان بنجديدة من بينالتي.
وللإشارة فالماتشات بجوج عرفو غياب جمهور الفرق بأربعة، بسبب المقاطعة ديال الألتراس على قبل الاحداث اللي كاتعرفها عدد من مناطق المغرب بسبب احتجاجات وأعمال عنف ما يعرف بـ “جيلZ”.
وبهذه النتائج خداو الوداد 3 نقاط جديدة، رفعو بها رصيدهم من النقاط إلى 10 نقاط، وخداو صدارة البطولة الاحترافية مؤقتا، وبالمقابل ضيعو الرجا الصدارة وخداو غير نقطة رفعو بها رصيدهم إلى 8 نقاط، ومحتلين المركز الثاني مؤقتا، وهذا الشي قبل الديربي بيناتهم الدورة الجاي.