وكالات//
جريمة خطيرة وغامضة فجّرات موجة ديال الاحتجاجات الكبيرة فالأرجنتين، هاد السيمانة، بعدما تقتلو فيها 3 ديال البنات، فواحد القضية اللي كتشير السلطات أنها ممكن تكون مرتبطة بتجارة المخدرات.
الآلاف ديال الناس خرجو يتظاهرو فوسط العاصمة “بوينس آيرس” نهار السبت، وكيطالبو بالعدالة فجرائم قتل العيالات، خصوصاً من بعد ما تقتلو هاد البنات الثلاثة، من بعد ما تعرضو لتعذيب وحشي تبث فبث مباشر، ومن بعد دفنوهم فبلاصة وحدة.
وذكرات مصادر من البرازيل أن الضحايا هما لارا غوتيريز (15 عام)، وبنات عمها مورينا فيردي وبريندا ديل كاستيو (20 عام)، اللي تعذبو وتقتلو على يد عصابة ديال المخدرات، فواحد الجريمة اللي تْبثات مباشرة باش تكون إنذار للآخرين.
وقالت المصادر إن السلطات شدّات 5 ديال الناس اللي مشكوك فيهم، ولكن الزعيم ديال العصابة اللي متّهم باقي هارب.
وصرّح وزير الأمن الإقليمي، خافيير ألونسو، أن الضحايا تْغَرّو، وقالو ليهم غادي تمشيو لشي حفلة، ولكن عذبوهم قبل ما يقتلوهم.
وزاد وقال بللي الجريمة تْشافَت مباشرة على البث المباشر، من طرف 45 شخص، كانوا منخرطين فحساب مغلوق فمواقع التواصل، باش تكون عبرة وسط شي شبكة إجرامية باين أنها منضّمة.
الجثث ديال مورينا وبريندا ولارا تلقاوهم نهار الأربعاء، مدفونات حدا دار فواحد الحومة فالجنوب ديال العاصمة “بوينس آيرس”، بعدما كانو مختفيين لمدة 5 أيام.