هند لكلاوي – كود مراكش ///
البارح فبرنامج حواري جا معطل بزاف بزاف دارتو “دوزيم” على احتجاجات جيل “Z ، قالت المقدمة الصحافية سناء رحيمي بعبارة غبية بزاف “بكل أمانة و بحرية أنا كنتكلم فهاد البث المباشر كإعلامية و كنتحمل مسؤوليتي، را ميمكنش يعيط لينا الوزير عا ف التدشين و نهار لي يكون حدث بحال هاكا كنعيّط ف تيليفون لجميع الوزراء تا واحد ماكيبغي يجاوب “. علاش قلت عبارة غبية؟. لسبب بسيط بزاف هو ان هاد الشي ما تقوليهش باش تباني واعرة. طبقيه. وغادي نعتابروك شجاعة بزاف ايلى من اليوم رفضتي أنشطة جميع الاحزاب. قاطعي معرض الفرس. فيه وزارة الفلاحة. قاطعي حتى جميع الأنشطة اللي كيكونو فيها وزراء الحكومة. هاديك نقول ليك برافو بزاف برافو. نقولو عليك راكي حرية وتحملتي مسؤوليتك.
علاش كتباني “مدعية” شجاعة بهاد التصريح هو انك باش قدمتي نشرات اخبار والمغرب فيه احتجاجات جيل Z القناة للي خدامة فيها واللي هي ديال الدولة والاعتمادات المالية كتعطيها ليها الحكومة، ما دارت حتى خبار. ما فراسهاش هاد الحدث.
شكون منعك ديري خدمتك الصحافية وديري مواكبة مهنية حرفية؟ واش الحكومة؟ واش الوزراء؟ واش الدولة وقولي لينا.