محمد سقراط-كود///
إصلاح التعليم راه مطلب لكل عاقل في هاد البلاد، التعليم هو مفتاح التقدم والتطور، واخا كاع نكونوا دولة غنية بالموارد الطبيعية ولكن بلا تعليم ماغادي نديرو بيها والو، غاهو إصلاح التعليم كمطلب فضفاض وغير متفق عليه، أنا مثلا بالنسبة ليا وهذا ماشي رأي بل حقيقة علمية، خاص تعليم علماني حذف اللغة العربية والتربية الإسلامية من المقررات، وتدريس نظرية التطور كحقيقة علمية، وتدريس التاريخ من وجهة نظر مورية، ومنع الحجاب في المدارس فاش تشد الباك وتوصل لسن الرشد تدير في راسها مابغات، بينما مثلا الغلام الأمرد بالنسبة ليه إصلاح التعليم هو يقراو البنات في الدار والدراري في المدرسة، كاين لي إصلاح التعليم بالنسبة ليه هو البنت تقرى ولكن حدها السادس، بالنسبة للفقيه خاص نرجعوا للتعليم الأصيل والكتاتيب القرآنية والفلاقة والسلكة، وبالنسبة للخوانجي الموديرن خاص نقريو الاقتصاد الإسلامي على أساس كاين شي إقتصاد في الغزو والإستعباد والتحكم في التجارة والضرائب المكوس الكثير، بالنسبة لليساري خاص فلسطين تكون في كل حصة سواء ديال الرياضيات أو الفيزيك وفي الرياضة يتعلمو يشطحو الدبكة.
كذلك قطاع الصحة أنا مثلا بالنسبة ليا الدولة خاص ترفع يدها على قطاع الصحة وداكشي لي كتكبوا في الصحة تحولوا للتعليم، لأنه غير ضياع ديال الفلوس وخاص نتبعوا النمودج الأمريكي وهو التأمين الصحي عند الشركات، مرة تقدر تخلصوا نتا أو يخلصوا صاحب العمل على حساب الوظيفة، طبعا تكون إستثنائات كبار السن الفقراء، أو قدماء المحاربين، دولة بحال ميريكان إقتصاد كيخلع ومع ذلك معندهمش هاد مفهوم المجانية لي باغي المغربي بناتج محلي ديال مية وخمسين مليار ماواصلاش حتى ثروة أفراد في مييريكان، بينما واحد آخر غادي يبغي علاج مجاني مية في المية، والأطباء بالعرام وفي كل مدينة ودوار، ومستوصف قبالة كل دار في راس الجبل، وفيناهي الدولة تدير لينا وتفعل لينا وتعطينا، بينما منطق الأشياء كيقول خاص الدولة تبعد منا وحنا ندبروا لراسنا، داك الساعة لي فيه شي فايدة غادي يتنافس ويخرى الزيت باش يقدر يخلق الثروة أو غير يصور نهارو.
علاش مثلا الحراك في أندونيسيا نجح، لأنه خرج ضد قانون محدد وتلغى القانون من بعد الإحتجاجات إذن نجح، في نيبال كذلك كان عندهم أهداف ومطالب واضحة، هنا راه باقي كندورو في نفس الدائرة هادي سبعين عام، بغينا إسقاط الفساد وإصلاح الصحة والتعليم، وكي غادي ندير ليها، أنا مثلا بالنسبة ليا دولة بلا موارد طبيعية ماغادي تمشي فين بلا الإستثمار في البشر لي فيها، والإستثمار في هاد الناس خاص يبدى من القوانين لي كتقيد تطورهم وحداثهم ومواكبتهم للعصر.