احمد الطيب كود الرباط//
بلا لغة الخشب، احتجاجات جيل زيد خرجت عن دائرة الاحتجاج ودخلت لساحة “تصفية الحسابات السياسية”، يعني مبقاش شباب زيد ولا هم يحزنون دبا.. كاين توجه يروج له لإنهاء عزيز أخنوش، رئيس حزب الأحرار، سياسيا قبل 2026. وهو نفس المشهد لي كان مع مسيرة ولد زروال ف 2016 ضد “البي جي دي” بعنوان “مسيرة ضد أخونة الدولة”.
أولى الإشارات ديال هاد التوجه، هو النقاشات لي دايرة بين السياسيين، “كود” سولات عدد من السياسيين منهم قادة في أحزاب المعارضة، للي أغلبهم أكدوا بأنه تم تحويل الحركة الاحتجاجية إلى “ورقة سياسية” للضغط على أخنوش من أجل الاستسلام قبل انتخابات 2026.
كاين لي مشا بعيد، وقال بلي شي جهات مبغاتش يعاود اخنوش ف 2026، وبلي التكلفة السياسية غاتكون باهظة. لأن هاد الجهات عندها تقديرات سياسية مبنية على معطيات وتقارير كتشوف بلي من المصلحة ديال البلاد يمشيو الأحرار ف الفترة المقبلة.
ثاني الإشارات، هي الإعلام العمومي، هاد الأيام داير حملة على قادة ووزراء الأحرار، وف سابقة ولى كينقل هاد الاحتجاجات، فاش بداو كيرفعو شعار “أخنوش ارحل”. مع الإشارة إلى أن الإعلام العمومي وجاب مؤثر ومشارك ف احتجاجات جيل زيد (واخا هو ماشي من هاد الجيل) وقدموه صحفي واخا هو ماشي صحفي وعندو مهنة مدير تربوي فمؤسسة بريفي، وكان يستضيف المعارضين منهم قادة فجماعة العدل والإحسان غير المرخصة. ويقال بلي هاد المؤثر كان فالجماعة وتربيتها.
فالرباط، وكيف عاينت “كود” للي رفعو شعار أخنوش إرحل، ماشي معارضين وماشي منتفضين وماشي جيل زيد، راهم جزء منهم معروفين بـ”العياشة”.. للي بغا يعرف جيل جيل زيد يشوف تعليقاتهم ف السوشل ميديا. راه الدولة كلها طلعات ليهم فالراس وكيسبوها بـ طرولات وكيخشيو الهضرة لأعلى سلطة فالبلاد.
الهدف واحد والأساليب كتختلف ومتنوعة، واخا بقات غير 10 شهور للانتخابات، والمعروف ان الحملات الانتخابية كتبدا على الاقل قبل 6 شهور بقوة.
الأحرار فهم المساج، ولغا لقاءاته الجهوية لي كان قررها، ومنها لقاء كان مقرر هاد الويكاند ف جهة بني ملال. واش مستعد الحزب يرجع اللور ويخفف من اللقاءات لي داير. وطبعا دايرها بإمكانيات لوجستيكية ومالية متقدرش تنافسو باقي الاحزاب. يعين قادر يربح عاود الانتخابات بقوة رجال المال والاعمال وامتداداتهم فالمدن والقرى.
اليوم حروب بين عدة سلطات، منها السلطات الخفية للي كتستعمل كاع الاسلحة الممكنة منها ما هو افتراضي وتواصلي واعلامي.. فالحروب الخفية مكيكونش للدستور دور ومكيستوقش ليه، تيكون الهدف هو الضغط وايصال الرسائل الممكنة باش للي مقصود بها يفهمها ويتنحى قبل فوات الآوان.