كود كازا ///
من المفروض فشي حدث تنظمو شي مؤسسة حكومية اليوم ياخذ بعين الاعتبار رغبة لمغاربة فالتغيير. كل نهار تقريبا وقفات واحتجاجات لجيل “زد” كطالب بالاصلاح، والسي وزير الشباب والثقافة والاتصال محمد مهدي بنسعيد دار اليوم فكازا “مناظرة وطنية” للاشهار.
اللي خاص دابا مناظرات ولقاءات وحوارات حول مستقبل لبلاد. مستقبل شبابنا ماشي على الاشهار. المستفز فهاد المناظرة هو دايرينها بالفرنسية. اييه باللغة الفرنسية. هادي ماشي لغة لمغاربة. هادي لغة مستفزة للمغربي. لمغاربة عندهم لغاتهم فدستورهم وما فيهش هاد الفرنسية.
من المفروض كلشي خاصو يقاطع اي مسؤول مغربي هدر بلغة ماشي لغة بلادو. دابا هاد بنسعيد المسكون بتنظيم تخربيق بحال هادا، باغي يدخل راسو فهاد القطاع. يمكن شاف فيه امكانية لصحابو لملايرية يدخلو لهاد القطاع.
علاش على قبال مصاصي الدماء ديال صحاب الاشهارات اللي فيهم شي فرنساويين تفرض على مناظرة وطنية مغربية لغة فرانسا.
خاص قطيعة مع هاد الشي. القطيعة خاصها رجالها اكيد وزير الشباب والثقافة والاتصال ماشي منهم. راه تمغرابيت ماشي دير النشيد الوطني وتطلب من كلشي يوقف. التمغرابيت هي تهدر بلغة ديالك ماشي لغة المستعمر