محمد سقراط-كود///
كنظن بلي سيد النبي في السنوات الأولى للرسالة وماقنعش هاد العدد لي كيدعيو الصفحات الفايسبوكية أنه سلم في قطر في بداية المونديال، لدرجة تحول الأمر من تظاهرة رياضية كروية لبرنامج دعوي كأن قطر والصفحات الفايسبوكية مكفاوهمش هاد مليار ونص مسلم لي في العالم وباغين ضروري يديرو لينا الزحام في الجنة، هو السياسة ديما حاضرة في الرياضة واخا كيدعيو العكس، ولكن دابا تزادت الدعوة الدينية مع كورة وهادي كنظن سابقة، تقدر تشوف في الدول المسيحية رجل دين مسيحي كيبارك فرقة أو تيران أو مدينة أو منتخب، ولكن تشوفو كيعمد مشجعين مسلمين وكيدعيهم للمسيحية هادي كانت غادي تكون كارثة وتدير ضجة وتقدر تسبب في داكشي لاخور راكم عرفتوه بحال لي وقع لسلمان رشدي والمخرج الهولندي فان كوك والأستاذ الفرنسي ديال هادي شي عامين.
ماذا لو كاس العالم تدار في الطاليان مثلا أو في أي دولة وشفنا المسلمين غادين يتفرجوا ويبداو يتلقاوهم رجال الدين المسيحيين ويدعيوهم للكاثوليكية، طبعا المسلمين مكانش غادي يعجبهم الحال ويعتابرو الأمر مؤامرة على الإسلام والمسلمينـ، ويدعيو لمقاطعة المونديال والمنتوجات الموندياليةى والغاء اشتراك بيين سبورت، ومكنظنش كانوا غادي يهدروا على التسامح وكيفاتش المسلمين لي مشاو لتم شافو النور ديال سيدنا خيسوس وآمنو بيه، طبعا كانوا غادي يعتابرو الأمر إمتداد للحروب الصليبية، غا هو الغرب حاليا مابقاش كيبشر بالمسيحية حيت مابقاتش موضة عندو وللى كيبشر بحقوق الإنسان وحرية الصحافة وحرية المرأة وبقيم نتفليكس.
الإسلام أنواع وأشكال ملل ونحل، وكلها وإسلامو لي كيدعي ليه، إيران راه حتى هي مسلمة وكتدعي للإسلام وكتعطي الدرونات للبوليزاريو باش يقتلوا المغاربة، الجزائر مسلمة وأكثر دولة في العالم هدفها هو تضر بلادنا، أنواع وأشكال ديال الإسلام في السوق عزل وإختار، لذا خاص حتى دوك لي كيحطو هاد الخبارات الملاوطة ديال إسلام مليون مشجع كرواتي حيت مشاو يتفرجوا كاس العالم في قطر ومالقاوش البيرة وهوما يدخلوا في دين الله أفواجا بسباب القطعة، خاص يقولوا لينا شمن إسلام لي سلموا هاد الناس واش إسلام قطر الإخواني ولا إسلام إيران الشيعي ولا إسلام دولة الإسلام، ويبقى إسلام هادي بلاد الإسلام أولاد…… هو أحسن إسلام.
Laisser un commentaire