گود سبور//
يواصل المنتخب الوطني المغربي لأقل من 20 عام، تقديم العروض الواعرة ديالو فـ كاس العالم U20، المقامة حاليا فـ الشيلي، وقدر يعادل الإنجاز التاريخيّ للكورة المغربية اللي تحقق عام 2005، بالوصول لدومي فينال البطولة.
ونجح المنتخب الوطني المغربي فـ التأهل لدومي فينال مونديال أقل من 20 عام، بعدما ربح اليوم الأحد منتخب الميريكان فـ ماتش قاصح برسم ربع نهائي البطولة بنتيجة 2-1، وقدرو الأشبال يماركيو الهدف الأول فـ الدقيقة 31 بواسطة فؤاد الزهواني، والميريكان قدرو يماركيو التعادل بواسطة كامبل من بينالتي فـ الدقيقة 46.
ورجع المنتخب المغربي وماركا الهدف الثاني فـ الدقيقة 66 وهو هدف ماركاه المدافع الميريكاني ويدنير على راسو، قبل ما يزيد ياسين جاسيم الهدف الثالث فـ الدقيقة 85، مع العلم أن الماتش كان قاصح ومفتوح بين المنتخبين اللي كانو بجوجهم يقدرو يماركيو أهداف أخرى سوا اللاعبين المغاربة اللي دارو ماتش بطولي أو المراكنا.
وبهذه النتيجة تأهل المنتخب الوطني المغربي لأقل من 20 عام، المكون من ما يعرف بـ “جيلZ” لدومي فينال مونديال U20، وعادل إنجاز “جيلY” الجيل اللي قبل منهم واللي كان تأهل للدومي فينال عام 2005 لأول مرة فـ تاريخ الكورة المغربية، وهادي هي ثاني مرة كايتأهل فيها المغرب للمربع الذهبي.