كود احمد الطيب الرباط ////
الشعب المغربي اليوم كيتسنى خطاب رئيس الدولة الملك محمد السادس فافتتاح الدورة الخريفية للبرلمان اللي كيكون الجمعة الثانية فشهر اكتوبر كل عام. كيتسنى الشعب الخطاب واخا هو الخطاب الوحيد اللي كاين تنصيص عليه فالدستور المغربي والخطاب الوحيد للي كيكون موجه للبرلمان وللشعب المغربي. الفصل 52 من الدستور ديالنا فيه “للملك ان يخاطب الامة والبرلمان ويتلى خطابه امام كلا المجلسين ولا يمكن ان يكون مضمونه موضوع اي نقاش داخلهما”. هاد الخطاب ما كتكونش فيه عبارة “شعبي العزيز”.
حسب ما صرح بيه عبد الغني مريدة، أستاذ القانون الدستوري وعلم السياسة بكلية الحقوق بجامعة سيدي محمد بن عبد الله بفاس فهاد الخطابات “هي مبدئيا موجهة إلى البرلمان ولكن في عموميتها وشموليتها تهم الجميع. كما أنها أحيانا يمكن أن تتناول ملف واحدا وأحيانا تكون قضايا متعددة ومتنوعة تهم توجيه البرلمان والحكومة نحو مبادئ معينة”. واكد ل”كود” فتصريح سابق باللي “بحكم أن السياق أو الظروف الحاليين يأتي افتتاح البرلمان هذه المرة في ظرف ذو خصوصية تتميز بوجود احتجاجات اجتماعية لها مجموعة من المطالب مثل الصحة والتعليم، ولهذا لا يستبعد أن يحمل الخطاب الملكي لهذه المرة مفاجئات”.
اللي معروف على سيدنا قدرتو فابداع اجوبة على مطالب شعبو. ما كاينش شي بلاصة فيها من الرمزية باش يبعث رسائل كثر من مجلس النواب والمستشارين.
الخلل فالبلاد من ضمن بزاف، كاين فالتمثيلية. كاين فممثلي الشعب المغربي فاعضاء البرلمان بغرفتيه. النسبة القليلة نسبيا، فاخر انتخابات تشريعية فبلادنا، كتبين كان المشكل.
سيدنا فمناسبات كثيرة زوينة او اللا كان يختار الكلمة المناسبة والاسلوب المناسب باش يدوز الميساج.
طبعا هادوك اللي باغيين حل سحري يبدل لبلاد ف24 ساعة راهم كيزايدو وهدفهم حاجة اخرى ماشي الاصلاح.
محمد السادس ملك اصلاحي حبو شعبو. كيحسو بيه ديما قريب منهم. شفنا كيفاش تجاوبو معاه باش طلب منهم ما يدبحوش فالعيد لكبير. اليوم اكيد غادي يهدر على اللي عاشتو بلادنا هاد ليام “احتجاجات جيل “زد” بطريقة كيبدعو فيها العلويين وسبق وتألق فيها سيدنا.