أنس العمري – كود///
ابتداء من اليوم الأحد، ولى ضروري على أي مسافر ماشي أوروبي، وحتى المغاربة، يقدمو تصويرة وبصمات صبعانهم ملي كيدخلو لشي بلاد من بلدان الاتحاد الأوروبي.
هاد النظام الجديد ديال المراقبة الإلكترونية جا باش يحارب الحريك ويقوي الأمان فحدود أوروبا.
النظام غادي يعوّض داك الطابع اليدوي اللي كان كيتدار فالباسبور، وغادي يسهل تبادل المعلومات بين الدول الأعضاء.
ماركوس لاميرت، الناطق باسم المفوضية الأوروبية، قال: “هاد الخطوة مهمة باش يكون عند الاتحاد الأوروبي نظام حدودي أكثر أمان وفعّالية، ويحدّ من الهجرة غير القانونية ويحمي المواطنين الأوروبيين”.
النظام غادي يسجل تاريخ الدخول والخروج ديال المسافرين، وغادي يرصد الناس اللي كيتجاوزو المدة ديال الإقامة أو اللي ترفض ليهم الدخول.
من اليوم، خاص كل مسافر ماشي من الاتحاد الأوروبي يدير رقم الباسبور ديالو والبصمات والتصويرة ديالو فآلات إلكترونية (أكشاك) عند المعابر الحدودية فالدول الأوروبية، باستثناء قبرص وإيرلندا.
وحتى دول منطقة شنغن اللي ماشي أعضاء فالاتحاد الأوروبي بحال النرويج وسويسرا وليختنشتاين وآيسلندا، غادي يطبقو هاد القرار.
شركات الطيران حذرت باللي ممكن يتسبب هاد النظام فطوابير طويلة فالمطارات، خصوصاً الكبيرة، ولكن التطبيق غادي يكون بالتدريج.
بعض الدول بحال فرنسا وإسبانيا وألمانيا غادي تبدا بتفتيش جزئي، ووزارة الداخلية الفرنسية قالت باللي “كلشي غادي يرجع للطبيعة العادية فـ12 أكتوبر، وماغاديش يكونو مشاكل ديال الزحام”.
البلدان الصغيرة فالاتحاد الأوروبي بدات فعلا فالتطبيق الكامل ديال النظام ابتداء من اليوم، وبحلول أبريل 2026 غادي يكون خاص بجميع الدول الأعضاء ودول شنغن.
وفـ2026 غادي تبدا مرحلة جديدة بنظام رقمي للسفر اسميتو” ETIAS”، اللي غادي يولي ضروري حتى لمواطني الدول اللي ما كيتحتاجوش الفيزا باش يدخلو لأوروبا فإقامة قصيرة.