الزلزال ضرب فالمدينة اللي لاعبين فيها الأشبال ضد فرانسا دومي فينال المونديال. اللعابا بيخير وواحد من الشيلي: كيف والو هاد الشي

گود سبور- ڤالباراديسو//

ضرب الزلزال فـ مدينة ڤالباراديسو بالشيلي اللي لاعبين فيها المنتخب الوطني المغربي لأقل من 20 عام، دومي فينال مونديال U20 ضد منتخب فرنسا اليوم الأربعاء مع 9 الليل بتوقيت المغرب.

وضرب الزلزال بمدينة ڤالباراديسو الشيلية قبل لحظات من مساء اليوم الأربعاء، ووصلت الدرجة ديالو إلى 5.7 درجات على سلم ريشتر، وسول جورنال “گود” مصادر داخل بعثة المنتخب الوطني المغربي لأقل من 20 عام، واكدو لها ان كلشي بخير، واحد من هاد المصادر أكد لـ گود، وقال: “حسيت بالزلزال ولكن عادي. كلشي بخير”.

وحسب ما عاين جورنال “گود” فهاد الزلزال عادي عندهم فـ الشيلي، وواحد من المواطنين بمدينة ڤالباراديسو قال لـ “كود” باللي ما حس بوالو ووضح: “راه متعايشين مع الزلازل. ديك 5.7 درجة على سلم ريشتر عادية بزاف عندنا”.

إقرأ الخبر من مصدره