محمد سقراط-كود///
من بين المآسي اليومية لي يقدر يعيشها أي مغربي حاليا من غير إلى كان -بومر متقاعد حياتو دايزة بين القهوة والجامع والتلفازة- هي يكون ساكن قبالت شي جامع أو مدرسة عمومية او خصوصية لي كان، الجامع غير كيتبنى ويكمل ويبداو الناس يصليو فيه كتحول الساحة الأمامية ديالو لسويقة وجوطية وكتقطع الطريق وكيكثر الربيج والوسخ والزبل، هادشي ماشي عاودوه ليا راه عشتوا وكنت ساكن حدا جامع على ود صلاة الفجر، ولكن للأسف ندمت بسباب الفوضى لي ولات قبالتو وباقا ليومنا هذا حتى خلاوني قطعت الصلاة أصلا، واخا الصراحة اللهم الديسير والخضرة والتقاشر والا صحاب الكاسيط والكتب ديال الوهابية والتطرف والإرهاب لي كانوا كيتباعوا قبالت الجوامع في التسعينات والالفينات.
السكن قبالت المدارس هاديك كارثة خرى، اغلب المدارس وخصوصا الثانوي والاعدادي المحيط ديالهم راه كارثة وشبعان سلوكات منحرفة، انا نيت راه في المدرسة فين تعلمت تعاطي كاع الموبيقات، قبالت المدرسة كان كيتابع الكارو والحشيش والديليو والسيليسيون، وقبالت أي مدرسة كنتي كنلقى بيار عبارة على وكر لإستهلاك المخدرات، حاليا هاد القانون الجديد ديال ممنوع يخرجوا التلامذ من المدرسة حتى تكمل ساعة القراية كنظن غادي ينقص من هاد الظواهر شوية، الكارثة راه حتى المدارس الخاصة فيها نفس الموشكيل، ومنزغيررهادشي كاين كارثة خرى هي النقل المدرسي.
كتلقى مدرسة فيها ربعمية تلميذ خمسين كيمشيو في النقل المدرسي والباقي كتوصلهم نفس عدد الطوموبيلات كل نهار، هادشي لي كيخلق مشاكل ديال الزحام في الطريق وشوارع كلها كتسد، راه لا يعقل هاد الحماق الجديد ديال وصل ولدك حتى لباب المدرسة كل نهار بطوموبيل خاصة، خاص الدولة تتدخل باش يتوقف هاد الحماق راه مضر بالبيئة وكيخلي العيش في المدن جحيم لا يطاق، خاص يتمنع إيصال التلاميذ للمدارس الخاصة بالطوموبيلات الخصية، كل مدرسة خاص تفرض عليها الدولة اسطول ديال نقل التلاميذ على غرار نقل العمال، وفي كل صباح يتم جمعهم في نقط جمع ماشي يدور على مل واحد في دارو، ويوصل ويفيق الحومة والكلاكصون، أول قرار خاص يتخاد لإصلاح التعليم هو هذا، وقبالت كل مدرسة يكون يكونوا شي خمسة دالبوليس مهمتهم تحرير المخالفات للي كيوقف وسط الطريق ويدير السينيالات بربعة بحال الى موصل شي واحد من جرحى حرب الرمال للمستعجلات.