وكالات//
ناضت روينة كبيرة فوسائل الإعلام على وصية الممثلة الأمريكية الراحلة ديان كيتون، بعدما خصصات 5 مليون دولار لكلبها “ريجي”، اللي كانت كتشوفو أعز رفيق فحياتها.
وحسب مصادر قريبة منها قالت لموقع RadarOnline، ديان كيتون، اللي كانت بطلة فيلم Father of the Bride وتوفات نهار 11 أكتوبر وعندها 79 عام، كتبات فوصيتها باش هاد المبلغ يتصرف على الكلب ديالها، باش يتهلى فيه مزيان ويعيش مرتاح فدار خاصة.
https://www.instagram.com/p/DPt3NjziQTd/?utm_source=ig_embed&ig_rid=705284c4-7643-4834-92ff-b9bdb73eff5b
ديان كانت تبنّات “ريجي” فـ2020، وكانت كتخرج معاه بزاف فتصاور فالسوشيال ميديا ديالها، وآخر مرة دارت بوست كان فـ”اليوم الوطني للحيوانات الأليفة”، وكتبَت فيه واحد التعليق اللي أثر فالناس: “قلبي على أربع.”
والمصادر أكدات أنها كانت كتشوف “ريجي” بحال فرد من العائلة، وحتى هي قالتها فواحد المرة ضاحكة: “كنحب ولادي، وآل باتشينو، والهندسة، وداك الكلب.”
وماشي غير الكلب ديالها اللي كانت مهتمة بيه، حتى فوصيتها دارت جزء من الفلوس باش يعاون جمعيات كتخدم على رعاية الحيوانات، باش تكمل فهاد المجهود اللي كانت كتديرو طول حياتها.
وكانت معروفة بدعمها الكبير لمركز “هيلين وودوارد” ديال الحيوانات فجنوب كاليفورنيا، وكانت كتشارك فحملات التبرعات والإنقاذ، وكانت حتى عضو فمجلس الإدارة ديالهم لأكثر من 20 عام.