ف إنجاز طبي فريد من نوعو.. دب رجع يمشي بعد ما دارو ليه ساق اصطناعية (فيديو)

وكالات//

قدر واحد الدب سميتو “فاسي” يرجع يمشى على رجليه من بعدما دارو ليه أول رجل اصطناعية من نوعها، بعد إصابة خطيرة تعرض ليها فـ2019 ملي طاح ففخ فولاية كارناتاكا فالهند.

من بعد ما نقذاتو منظمة “إغاثة الحياة البرية”، تنقل فاسي لمركز بانيرغاتا لإنقاذ الدببة فمدينة بنغالور، وفين اضطرّو الأطباء يبترولو الرجل الخلفية اللي تضرّات بزاف.

ورغم أنه بدا يتأقلم ويمشى على ثلاثة ديال الرجلين، الأطباء لاحظو أنه كيتحرك بصعوبة، وهكا قررو يصاوبو ليه طرف اصطناعي باش يحسنو ليه جودة الحياة ديالو.

العملية كانت بتعاون بين منظمة Wildlife SOS وحديقة بانيرغاتا البيولوجية، وإدارة الغابات ديال كارناتاكا، وبمساعدة خبير عالمي فالأطراف الاصطناعية سميتو ديريك كامبانا، اللي صاوب الطرف باش يوافق طبيعة حركة الدب.

ومن بعد ما ركب ليه الساق الجديدة الدكتور أرون أ. شا، بدا فاسي كيمشى مباشرة واسترجع التوازن ديالو، واعتابرو هادشي إنجاز طبي كبير ماوقعش من قبل. والأطباء قالو أن هاد الطرف غادي يعاون فاسي يعيش حياة أطول وبراحة أكثر.

إقرأ الخبر من مصدره