عثمان الشرقي – كود //
“الشْجرة رمز للحياة والبركة، وكتعاود قصص وأساطير من اليابان مع ساكورا، لإفريقيا مع الباوباب، ومن أوروبا القديمة حتى للأمازون ومنساوش المغرب ، كل شعب كيعطي للشجرة قيمة خاصة، وكيعتابرها سانسور بين الأرض والسما، كناش ديال لرواح وبنادم ،أجيو نشوفو كيفاش الشْجرة كتعاود على راسها”
نبداو متلا فاليابان، كاينة “الساكورا”، شجرة الكرز، اللي كتعتبر رمز الحياة والربيع والجمال المؤقت. الناس كيمشيو يتفرجو فيها ويحتفلو بيها، وكيعتابروها لحظة للتأمل والتقدير، بحالا الروح ديال الطبيعة حاضرة.
أما فإفريقيا، بزاف ديال القبائل كيعطيو الأشجار مكانة مقدسة. كاين شجر بحال “الباوباب”، اللي كيعتابروه شجرة الحياة، كيحميوه وما مكيأديوهش وكيصنعو قدامو طقوس دينية واحتفالات باش يطلبو البركة والحماية.
فأوروبا القديمة، خصوصا عند السلت، كاينين الأشجار اللي كانت مقدسة بحال البلوط. الناس كانت كتمشي للمروج والغابات باش تصلي تحت العروش، وتطلب الحْكمة والجهد، وكتعاود بزاف ديال الأساطير على الأرواح اللي ساكنة فجدوع الشجر.
حتى فالأمازون والأمريكيتين، القبائل الأصلية عندهم علاقة خاصة مع الأشجار، كيعتابروها معلمة للحياة ومصدر للطاقة. كل شجرة عندها قصة، وكل جذع عندو روح، وكل ورقة كتجسد تاريخ القبيلة والأجداد
فالهند مثلاً، شجرة “البيبل” أو “الفيكوس” عندها قيمة كبيرة. كتعتابروها الشجرة ديال الحكمة والبركة، واللي كيجلس تحتها كيحس بالسلام الداخلي. بزاف ديال المعابد القديمة داير بها الشجر، وكيعتقدو أن الآلهة ساكنة فيها، حتى فالأعياد والطقوس الدينية، كاين ناس كيقدمو ليها “تعرݣيبات” ويصليو قدامها باش يطلبو الصحة والرزق والحماية.
فالمغرب عندنا الأسطورة الأمازيغية، ديال حمّو ؤنامير الذي تحولات مراتو لحمامة وسكنات فسما، ومني لقا حمو شجرة حدا راس العين طلع منها باش يشوف مراتو . هذه الشْجرة الكونية دترمز عند الأمازيغ إلى الربط بين لارض السما ، وبين و تُجسّد الخصوبة والحياة والاستمرارية، داكشي علاش عندها مكانة روحية في المعتقد الشعبي وكيتعلقو فيها الحجابات والحوايج طلبًا للبركة والشفاء والزواج.
هاد التقديس للشجر كيبين بلي الإنسان من بكري وهو عارف القيمة ديال الطبيعة، وكيفاش الأشجار كتربط بين الحياة اليومية والعالم الروحي، الشجرة ماشي غا ظليلة وتميرة، ولكن فيها الرمز، فيها، الأسطورة، والمقدس وكلا شعب كيحوضها بخريفتو الخاصة احتراما وتقديرا وتقديسا لالة الشْجرة.