كود هناء أبو علي ///
الساعات الأولى من هاد النهار الاثنين 20 أكتوبر 2025 المغرب دخل لتاريخ الكورة العالمية باش ربح المونديال أقل من 20 سنة فالعاصمة الشيلية سانتياگو بعد ما ربح الأرجنتين بجوج لزيرو.
فالوقت اللي كانو اللعابة كيصنعو التاريخ كان معلق “الرياضية” التابعة للشركة الوطنية للإذاعة والتلفزيون هامو غير يشكر سفيرة المغرب في الشيلي كنزة الغالي. هاد الاستقلالية اللي كانت من أكبر الداعمين لحميد شباط أيام كان النجل القوي فحزب علال الفاسي.
كيفاش هاد المعلق طاح لهاد المستوى ونسى اللعابة وبقى يشكر فالسفيرة. هادي مسؤولة ما دارت والو للمنتخب ما دارت والو للبلاد باش نربحو الكاس. كانت كتجري وتلبس التوني وتبندد وصافي. تعطي تصريحات وصافي. يعني سياسية خلات الديبلوماسية واستغلات الكورة باش تبان خدامة. طبعا عندها خبرة فهاد الشي. تربية حميد شباط
دابا الغرابة علاش معلق رياضي يشكر سفيرة. القضية فيها إن. خاص فتح تحقيق نعرفو أش دارت هاد السفيرة لهاذ المعلق. راه خطأ مهني جسيم هادا.
الصحافي والفرقة ديالو باش كيمشيو لشي حدث عندهم تعويض ديالهم ما محتاجين لحد.
لكن مع زمن بوطبسيل مدير “الرياضية” حسن اللي زادو فيصل لعرايشي الرئيس المدير العام للشركة الوطنية للإذاعة والتلفزيون باش يبقى فبلاصتو، كلشي مقلوب. بلاد كتحقق نتايج كبيرة فالرياضة بإعلام معطوب.
سيدنا فخطابو فالبرلمان هدر على الإعلام كيقصد الإعلام العمومي أي إعلام لعرايشي. بعد الخطاب كنا نتسناو تغيير يديرو سيدنا. هاد لعرايشي معيق لإصلاح الاعلام العمومي. خاصو يمشي فحالو ولكن القرار بيد سيدنا.
الدولة نشوفو واش باغية إصلاح ولا باغية تبقى الأمور كيف كانت. واش باغية مهنية ولا معلقين عوض يشكرو اللي دارو المجد يشكرو سفيرة راكبة على الموجة.