طيارة تحطمات ثواني من بعد الإقلاع ديالها من مطار ففنزويلا.. شعلات فيها العافية وماتو جوج الناس (فيديو)

وكالات//

تحطمات طيّارة عندها جوج دالموطورات من بعد دقايق قليلة على الإقلاع ديالها من مطار باراميلو فولاية تاتشيرا ففنزويلا، الأربعاء، وهاد الحادث تسبّب فموت جوج ديال الناس اللي كانو فيها وإصابة جوج آخرين. حسب الديلي ميل.. السلطات كتقول باللي ممكن يكون طرا انفجار وحدة من الرويض ديال الطيّارة ملي كانت كتقلع، وهو اللي تسبب فالحادث.

وشهود عيان قالو باللي الطيّارة حادت فجأة لليسار قبل ما تطيح وشعلات فيها العافية. الناس اللي كانو حدا المطار والعمال ديالو حاولو يعاونو، ولكن النار كانت قوية بزاف وما قدروش ينقذو الركّاب.

تحطم طائرة صغيرة بعد لحظات من إقلاعها من مطار #باراميلو في #فنزويلا ومصرع طاقمها #إرم_نيوز pic.twitter.com/F3Vc37yUT8

— Erem News – إرم نيوز (@EremNews) October 23, 2025

فالفيديوهات اللي تصوّرات، باينين أعمدة كبار ديال الدخان الكحل طالعين من البلاصة اللي طاحت فيها الطيّارة، واللاشيفات ديالها المحروقة تلاقاو قريب من مطار باراميلو اللي كيعطي الخدمة لمدينة سان كريستوبال فالغرب ديال البلاد.

هيئة الطيران المدني دارت تحقيق رسمي باش تعرف شنو كان السبب الحقيقي: واش عطل ميكانيكي، ولا خطأ من الطيّار، ولا مشكل فالصيانة. ومازال ما علنوش على شكون هما الضحايا، ولكن فرق الإنقاذ سدو البلاصة باش يديرو التحقيقات التقنية.

إقرأ الخبر من مصدره