كود كازا//
نعيمة بنيحيى غادة تحطم ارقام قياسية فالتعيينات ديال المقربين والحزبيين قبل ما تغادر الحكومة. اليوم المجلس الحكومي عين واحد من أعضاء المكتب التنفيذي للشبيبة الاستقلالية فمنصب مدير للنهوض بحقوق الأشخاص في وضعية إعاقة بوزارة التضامن والإدماج الاجتماعي والأسرة، من باب المجاملة والريع الحزبي لا أقل ولا أكثر.
من بعد فضيحة تعيين شي وحدة مكملاتش حتا عامين فالوظيفة فشي منصب مركزي، تهلات بنيحيى فواحد كل راس مالو مجاملة نزار والتقرب من آل الفاسي، واخا مزبلها، وداير زبلة كبيرة فحياتو والقضية معروفة فحزب الاستقلال.
القضية ولات باينة حزب الاستقلال كيدير خطاب الاستهلاك للمغاربة ديال الكفاءة ونظافة اليد والاستحقاق من جهة، وكيفرش الطريق للناس ديالو يديرو اكتساح لوزارة التضامن والادماج الاجتماعي والاسرة، واللي تبين اليوم أن تغيير الوزيرة حيار بالوزيرة بنيحى مغير تا حاجة على الأقل حيار تهلات فراجلها وسدات على الجميع.
هاذ الواقعة من المفروض تكون موضوع نقاش ومساءلة لأمين عام الحزب نزار بركة اللي خرج هاذي أسبوعين كيتهرب من مسؤوليتو الحكومية حيث الحكومة عند الاستقلال هي الريع والمناصب والمنافع ويلا كانت شي حاجة ماشي هيا هاذيك فالبلاد راه المشكييل فالاحزاب لخرين ماشي فيه هو.