احمد الطيب گود- الرباط//
حضور ناصر بوريطة وزير الخارجية والتعاون لنهائي كأس العالم اقل من 20 سنة ليلة الاحد الاثنين ما كان عندو معنى. هاد السيد وزير فاشل وديبلوماسي كيقلب غير على يبان. ما كانش يمشي. فماتش بحال هادا كانت الحكومة تتمثل فوديو الرياضة.
بوريطة فاشل بلا خدمة دايرها سيدنا ودايراها اجهزة الدولة بحال لادجيذ. شفنا كيفاش المغرب تهمش فمؤتمر السلام فالشرق الأوسط اللي حضرو ترامب رئيس امريكا وخرج من وقف إطلاق النار فغزة.
بوريطة من عينة المسؤولين اللي كيموت على راسو. احتقان كبير فالخارجية بسباب نزوع الهيمنة. كيبغي يهمين على كلشي.
شفناه فالماتش ما دبلوماسي ما والو. باش تحضر ماتش نهائي ومعاك ناس الدولة المنافسة خاصك تعبر على فرحتك بديبلوماسية. شفنا كيفاش مثل ونقز وهز جسمو القصير وطار من بلاصتو، بعد ما ماركا المغرب الهدف الاول ضد الأرجنتين وشفنا كيفاش عبر فوزي لقجع رئيس الجامعة الملكية المغربية لكرة القدم على فرحة بلا غوت بلا استفزاز للخضم ولديبلوماسية الخصم. فرح باحتشام. كان ديبلوماسي على الضعيف بوريطة
دابا هاد الفاشل ولى موضوع القنوات الفاشلة ديال فيصل لعرايشي ماشي ديال لمغاربة. ها الرياضية اللي نقلات الماتش نسات اللعابة وركزات غير على بوريطة والسفيرة كنزة الغالي. ها ميدي 1 تيفي كتمجد فيهم بجوج
واش التتويج دارتو الغالي اللي كانت مدافعة على شباط واليوم استغلات حدث باش تبان؟ اللا. واش دارو بوريطة؟ اللا
فـ الوقت اللي الناس اللي كانو ورا تحقيق المنتخب الوطني المغربي لأقل من 20 عام، لإنجاز التتويج بكاس العالم للشباب، راجعين اللور وساكتين، ناضت سفيرة المغرب فـ الشيلي كنزة الغالي كاتحاول تركب على الموجة.
السفيرة كنزة الغالي راه الدورة ديالها والعادي هو توفر استقبال للجمهور المغربي فـ الشيلي وتوفر أي حاجة محتاجينها لا هما لا المنتخب المغربي، وهذاك الشي اللي دارت راه ماشي شي حاجة خارقة، ولكن الدور ديال أي سفير فـ البلاد اللي هو فيها هو يتدخل مع سلطات هاد البلاد ويسهل لولاد بلادو الاجراءت ويوفر لهم اللي محتاجين، وماشي حيث كنزة الغالي استقبلت الجمهور المغربي فـ مطار سانتياگو ودارت لهم الغدا عندها بمقر إقامتها غادي نبداو نطبلو لها كيفما زارت واحد القناة عمومية ومعلقها لدرجة ان اللي شاف داكشي شك واش فيه ريحت الدغميرة.
شفنا كيفاش الاعلام العمومي ولى طبال لسفيرة عادية. راه اللي خاصهم الدعم والشكر هما جنود الخفاء ديال المنتخب المغربي بحال نور الدين النيبت وعبد الإله باگي وآخرين اللي كانو واقفين ورا المدرب محمد وهبي الأشبال قبل كاس العالم وفـ كاس العالم باش يتحقق هذا الإنجاز، وطبعا حيث هما شبعانين وما باغيينش يتزايدو على المغاربة وينسبو لريوسهم شي حاجة، كاينة واحد الفئة اللي منها السفيرة الغالي اللي اي فرصة بحال هادي مهمة بالنسبة لها باش تركب عليها سياسيا ولكن الخايبة هي قناة عمومية دير لها الإشهار بريحة الدغميرة.
راه الديبلوماسي اللي خدم الشيلي مزيان هو عبد القادر الشاوي. فرش مزيان مع اليسار. ضرب الدولة طول باش يقنع هاد المجتمع بدولتنا بمغربية الصحرا. هاد الغالي كتاكل الورث اللي خلاه هاد السفير
وباراكا من التطبال للفاشلين والفاشلات