أنس العمري -كود///
شعلات عافية كبيرة، البارح السبت ف العشية، فعدد ديال المحلات التجارية والمنازل فـ قيسارية الحفاري، اللي كاينة فـمنطقة درب السلطان بمدينة الدار البيضاء، وهاد الشي خلق حالة استنفار كبيرة عند السلطات الأمنية والمحلية والوقاية المدنية.
وحسب شهود عيان من عين المكان، النيران دارت الرعب وسط الساكنة والتجار، قبل ما يتدخلو رجال الوقاية المدنية مدعمين بتعزيزات أمنية كبيرة باش يسيطرو على الحريق ويمنعو الانتشار ديالو فالمحلات اللي حداه.
المعطيات الأولية كتقول باللي الحريق أتى على أزيد من 40 محل تجاري، بينما الأسباب ديال الحادث مازال ما تعرفاتش بالتدقيق، في انتظار نتائج التحقيق لي بداتو السلطات الأمنية لتحديد أسباب اندلاع النيران لي تسيطر عليها بعد تدخلات مكثفة لعناصر الوقاية المدينة.
