كود سعيد الشاوي ////
البارح الاثنين 27 اكتوبر 2025 كان حدث كبير واخا كيبان عادي. دوك الطراكس اللي ريبو هاديك الريسطو “لاڤيراندا” فكورنيش عين الدياب فكازا راه ماشي قرار ساهل. راه ما ريبوش بناء غير قانوني وكان عندو رخصة بيع الشراب، راه ريبو منظومة فساد كانت متحكمة فكازا. كيفاش تصورو وحدة دايرة سوسو سو صول اي الطابق الثاني تحت ارضي بلا رخصة. الغريب انو باش جا قرار الهدم خرجات كتسول السلطات واش عندكم قرار الهدم. مطيحة الباطل. انتي اصلا واش عندك رخصة ديال داك الشي اللي درتي.
علاش براڤو لفتيت لان وزارتو ورجالاتو فكازا وفالرباط تبعو الموضوع. طبقو القانون. هادوك اللي خارجين كيتباكاو راهم كيروجو غير للفايك. مشكلة ريسطو “لاڤيراندا” راه هو البناء العشوائي. الداخلية ومصالحها فكازا سلكات گاع المساطر القانونية. كلشي دار باسم القانون. الدولة ممثلة فالداخلية دارت خدمة نقية.
الهدم راه داز على كاع المساطر وماشي كيف كيروجو اللي خدامين عندنا. الهدم عندو علاقة بالبناء العشوائي فقط لا غير.
القضية غادية تاخذ ابعاد اخرى. راه السلطات مشات عند القضاء فهاد الملف.
دابا خاص وزير الداخلية يكمل مهامو اللي بداها ويهدم كاع الهانگارات العشوائية فاولاد عزوز ضواحي كازا. راه الولاية دكازا والعمالة اللي تابع ليها داك الشي ومصالح الداخلية بداو حملة ضد هادوك العشوائيات. فهاد القضية ديال الهونگارات راه غاديين يريبو كاع اللي كيدير نشاط صناعي فهاد المنطقة المخصصة للهونكارات الفلاحية.
كاين شي سمسار طاشرون كيستغل الصحافة كان دخل فمواجهة مع وزير الداخلية عبد الوافي لفتيت وقدر يوقف عملية الهدم هادي فترة. دابا جا الوقت لتطبيق القانون.
فكازا ف”مارينا” كاين اشباه هاد الطاشرون منهم واحد ف”اوسيان 2″ فالطابق 10 عام وهو فالاشغال كلشي غير قانوني. ما مسوق لحد. مصالح الداخلية عارفاه وعارفة وحدة اخرى فالطابق الرابع قدرات تقسم دارها ل4 ستوديو كتكريهم بطريقة غير قانونية. فوضى كبيرة خاصو ينزل فيها بثقل الوزارة باش نبداو نساليو مع هاد الفوضى