وكالات//
وقعات واحد القضية فولاية ميسيسيبي فمريكان دارت البوز، منين قررات إدارة التعليم تفصل معلمة بديلة فنهارها الأول فالخدمة، حيت نزلات فيديو فـ”تيك توك” فيه تلاميذها وتعليقات اعتابروها الناس ماشي مهنية وما كتحترمش القيم ديال التعليم.
وحسب جريدة “نيويورك بوست”، المعلمة اللي سميتها مياتا بوردرز وعندها 24 عام، صورت الفيديو فالقسم ديالها فثانوية ليك كورمورانت، وبانت فيه حاطة رجليها فوق مكتب المعلم، وكتضحك بسخرية على واحد التلميذ، وزادت صوّرات تلاميذ قاصرين بلا ما تاخد الإذن من والديهم، وهنا تزاد الغضب فالسوشيال ميديا.
https://x.com/futuretvnews/status/1982889728845492649
الجريدة زادت وقالت إن الفيديو كان فيه تلميذة لابسة جيب حمرا وصبّات حمر، وشادة كويرات صوفية، وعلقات بوردرز بتعليق اعتابروه الناس غير لائق ومسيء للجو ديال المدرسة. من بعد، إدارة مدارس مقاطعة ديسوتو خرجات بيان رسمي وقالت فيه باللي فصلات المعلمة فوراً، حيت اللي دارتو خرق واضح للقوانين اللي كتحرم تصوير التلاميذ أو نشر صورهم بلا موافقة مكتوبة من أولياء الأمور.
فالبيان قالو: “تم إبلاغ السيدة بوردرز بأنها ما بقاتش مؤهلة تْخدم كمعلمة بديلة فمدارس المقاطعة”، وأكدو أنهم كيلتازمو بأعلى معايير السلوك المهني فالمدارس.
هاد الحادثة رجعات فتحات النقاش فمريكان على واش خاص يتسمح للمعلمين يستعملو السوشيال ميديا فالمدارس، خصوصاً بعدما تكررات بزاف دالحالات بحال هادي اللي تسبب فيها محتوى غير مناسب. الجريدة زادت وقالت إن القوانين فميسيسيبي كتلزم تاخد الموافقة الرسمية من الوالدين قبل ما تصور أو تنشر أي حاجة فيها التلاميذ.