كود ـ سيدي رحال//
ليلة البارح الأربعاء 29 أكتوبر، عاشت جماعة سيدي رحال الشاطئ حالة من الهلع والخوف بعدما شعلات العافية فالمعرض التجاري اللي كاين قريب من الشاطئ، وما كايفصلو على مركز الدرك الملكي غير حوالي 100 متر.
العافية شعلات فواحد الخيمة وسط المعرض، اللي كان من شهور طويلة مقام فوق بلاصة كانت في الأصل موقف ديال السيارات، قبل ما تولي فضاء لتجار كيعرضو سلع بحال الحوايج، الأواني، المفروشات، مواد التجميل والعطور الرخيصة، كما كان حداه واحد لافوار ديال الألعاب.
شهود عيان قالو بللي العافية تشعلات بسرعة كبيرة بسبب الخيام اللي مصنوعة من البلاستيك اللي سهلت الاشتعال، وكاينين اللي ربطو السبب بغياب شروط السلامة فهاد المعرض اللي بقى من الصيف حتى لآخر أكتوبر، رغم أنه موسمي وكان خاصو يسالي من مدة.
التجار وبعض السكان ديال المنطقة دارو مجهود باش يطفيو العافية قبل ما توصل الوقاية المدنية، ولكن العافية كانت كلات واحد العداد كبير ديال السلعة.
من جهة أخرى، عناصر الدرك الملكي بسيدي رحال تحركات وبدات تحقيق باش تعرف الأسباب الحقيقية ديال هاد الحريق، واللي ما خلفش خسائر فالأرواح، غير خسائر مادية كبيرة.
عدد من الساكنة طالبو السلطات تعاود تراجع كيفاش كيتمنحو التراخيص لهاذ النوع من المعارض، خصوصاً اللي كاينين فمناطق حساسة وما فيهمش شروط السلامة والوقاية.
