ݣود-سبور//
من الأطلس، بالضبط من دواوير أيت بوكماز فإقليم أزيلال، طلع النجم الشاب يونس البحراوي طلعة واعرة بوصولو للعالمية. اليوم، البحراوي واحد من الركايز د المنتخب المغربي قل من 20 عام اللي متل المغرب فـ كأس العالم للشبان 2025 فـ تشيلي، واللي ربح فيها “أشبال الأطلس” الفينال ضد الأرجنتين.
البحراوي بدا الرحلة ديالو فـتورنوات محلية صغيرة فـ أيت بوكماز، مع فريق قروي بسيط سميتو أيت زيري. من بعد شافوه صيادة الأندية المغربية، وانتقل للكوكب المراكشي، فين بان كمهاجم خطير. ومع الصيف الأخير، شد الطريق لنهضة بركان بطونكرا حتى لـ يونيو 2026.
المدرب الوطني ديال فئة أقل من 20 عام عيط على يونس باش يدخل فـ اللائحة الرسمية اللي كتمثل المغرب فالمونديال. وف البطولة، البحراوي لعب بزاف ديال الدقائق المهمة وساهم فـ انتصارات كبار، بحال الرباح على البرازيل، أمريكا وإسبانيا، واللي خلا المنتخب المغربي يربح الأرجنتين فـ إنجاز تاريخي ما دازش من قبل. حسب بيانات ESPN، اللاعب دار أداء متوازن وقدّم دعم كبير فالخط الأمامي.
الناس اللي كيتبعو الكرة كيجمعو باللي القصة ديال يونس البحراوي كتلخص الرؤية ديال الجامعة الملكية المغربية لكرة القدم، اللي ولات كتعتمد سياسة ديال اكتشاف المواهب من جميع مناطق المغرب، حتى من القرى والجبال البعيدة، وكتعطيهم فرصة يدخلوا فـ منظومة التكوين الوطني..
من أيت بوكماز حتى تشيلي، البحراوي واحد من اللاعبين المغاربة اللي خرجو من الفيلاجات صغيرة ووصلو لملاعب كبار وكيبقا نمودج للكوايرية لي ممكن يوصلو فين كانو سوا من الجبل ولا من لوطا.