كود سبور//
كشف فوزي لقجع رئيس الجامعة الملكية المغربية لكرة القدم، خلال الكلمة ديالو اليوم الخميس كوزير للميزانية أمام لجنة المالية لمناقشة قانون المالية، ان حملة مقاطعة المنتخب الوطني المغربي وراها ايادي ومؤامرة لها علاقة بالجزائري اللي باغيين يعرقلو نجاح المغرب فـ تنظيم كاس افريقيا 2025، بعدما فشلو ينافسوه على الفوز بالتنظيم.
وهضر فوزي لقجع وقال: “كاس إفريقيا راكم عارفين شكون كان منافس ديالنا فـ التنظيم ومنذ ذلك الحين وهو يحاول جاهدا يبين أننا ما قادرينش، وبدات بالمؤامرة الحقيقية ديال الكلاب الضالة وعدم جاهزية الملاعب، وحتى ملي دشنا تيران مولاي عبد الله قاليك هادو فوطوشوب”.
وكمل لقجع وزاد وضح: “دابا نتكلمو بوضوح تام، وتدور النقاش حتى وصلنا نقاطعو واحد اللاعبين (المنتخب المغربي).. وهادوك اللاعبين راهم ولادنا، حنا الفريق الوطني فيه واحد من ايت بوگماس وواحد من الخميسات علاش نقاطعو هاد الدراري؟! شنو دار لينا أشرف حكيمي باش نقاطعوه؟! ياك حكيمي ولد القصر الكبير وكلى البيصارة مع سيمو (البرلماني)، علاش نقاطعو هاد الناس؟”.
وزاد وضح لقجع: “ملي كاتكون الأمور ماشي موضوعية ولا تنبني على أسس راه كاتهرس فـ البلاصة، راه خاصنا نستاغلو كاس افريقيا باش نستافدو من السياحة ونستافدو اقتصاديا وتستافد مراكش وتستافد الصناعة التقليدية وهذا هو استثمار الفرص”.
واكد فوزي لقجع: “الواقع اليوم هو تذاكر المنتخب المغربي سالاو من ساعة على عرضهم للبيع، اشمن مقاطعة واشمن نقاش؟ علاش كانهضرو راه هادوك اللاعبين ولاد الشعب المغربي، خاصنا نعاونو هاد الشباب باش يحيبو كوب دافريك”.