كود علي الصافي العيون ////
ناصر بوريطة وزير الخارجية والتعاون كان البارح فلقاء خاص نشطاتو الصحافية سناء رحيمي وحضرو الصحافيان رضوان الرمضاني وعبد الله ترابي. شكلا تجيب 3 صحافيين لوزير تخربيقة. المغرب ربح معركة الصحرا وتستحق الاحتفال. هاد الشي دارو الشعب. عبر عليه رئيس الدولة فخطابو ليلة الجمعة.
حوار مع ناصر بوريطة اللي ما كيعطيش حوارات للصحافة ديال بلادو، مناسبة يعطي خبارات. يعطي اش وقع. مناسبة نعرفو من الخارجية تفاصيل كثيرة.
كيف قلنا شكلا كانت تخربيقة “دوزيم” او اللي عطاهم هاد الشوار، يجيبو 3 صحافيين وعارفين باللي ما غاديش يكون حوار فهاد المناسبات. المناسب كان يكون لقاء خاص مع صحافي او صحافية ف”دوزيم” ماشي مع سناء رحيمي.
هاد الصحافية تقدر تعطي فالمواضيع الاجتماعية فتقديم نشرات الاخبار ولكن ماشي فالحوارات السياسية او من هاد النوع. ضعيفة فثقافتها الديبلوماسية. ما موجداتش مزيان او ما وجداتش كاع. عليها كان حوار “مونولوگ” هدر فيه واحد احد عاشق راسو وصورتو ناصر بوريطة.
باش تعرفو شوية كيفاش دار الحوار اللي فيه ساعة قل 2 دقايق نعطيو مثال غير بالسؤال الاول. تصورو ضيف. نساو شكون. بقى يهدر 7 دقايق بوحدو بلا ما يوقفو حد. ما يستفسرو حد. كيخطب بحال هاودوك ديول الاحزاب باش كيدوزو فالتلفزيون فالحملات الانتخابية.
فكرة بوريطة من اللول ان كلشي دارو سيدنا. هادي راها معروفة. كلشي لمغاربة عارفينها. كيفاش تجي كوزير خارجية وتكررها كل جملة. علاه كتعتاقد باللي شي حد فالمغرب كيقول باللي انت كدير شي حاجة فانتصارات المغرب الديبلوماسية؟ راه سيدنا دار كلشي ومخطط لكلشي.
انت خدمتك فلقاء بحال هادا تجاوب على اسئلة ماشي باش تسولك رحيمي=يمكن السؤال الصحافي الوحيد اللي سولاتو= على 3 اللي متانعو على التصويت للقرار الاممي التاريخي اللي رجع الحكم الذاتي تحت السيادة المغربية هو للي كاين، قال ليها نهدرو على 11 اللي صوتو على القرار. من غباءها انها ضحكات ودخل بوريطة فعنترياتو وبقى كيهدر على 11 اللي صوتو. رحيمي حتى باش سولو الرمضاني سؤال مهم ناضت قاطعاتو. دارتها جوج مرات. فالوسط وفاللخر.
الصحافي سولك جاوب على السؤال ماشي على اللي بقيتي انت. راه سيدنا بوحدو اللي كيدير خطاب لشعبو ماشي انت. سيدنا هو اللي يجي يهدر. انت وزير رد على السؤال.
المشكلة ماشي فبوريطة اللي بقى يهدر وبزاف. اللا. المشكلة هي رحيمي اللي ما فشلات فهاد الحوار. هي “دوزيم” اللي كتهمش طاقات عندها وكتركب فيهم الخوف يسولو امثال بوريطة