الرجا ربحو الكوكب فـ ماتش صعيب وخداو الصدارة بعدما باركو لسيدنا القرار الأممي بمغربية الصحرا وطالبو العالم يعتق الشعب السوداني (تصاور)

گود سبور//

قدرو الرجاء الرياضي يربحو الكوكب المراكشي فـ ماتش صعيب، بزز، اليوم الثلاثاء فـ سطاد دونور برسم الدورة 7 من البطولة الاحترافية.

الماتش بين الرجاء الرياضي والكوكب المراكشي كان غادي يسالي بنتيجة التعادل السلبي زيرو لزيرو بين الفريقين، واخا الرجا شدو الكورة وحاولو يخلقو فرص تسجيل ولكن هذا الشي ما خلاهمش يوصلو للشبكة ديال الكوكب، ولكن قبل ما يسالي الماتش بلحظات قدرو الرجا ياخدو بينالتي بعدما لمست الكورة يد مدافع الكوكب فـ الكاري والحكم رجع للفار وصفر بينالتي الخضرا وهو البنالتي اللي ماركاه معموري وخرجت الخضرا رابحة بواحد لزيرو.

الماتش بين الرجا الرياضي والكوكب المراكشي، عرف احتفال الرجاويين بالقرار الأممي الصادر عن مجلس الأمن المؤيد لمغربية الصحراء، والرجا دخلو معهم لافتة باركو فيها لسيدنا هذا الحدث، حتى جمهور الفريق الأخضر غنى على الصحراء مغربية.

وديما مع جمهور الرجا، وفهاد الماتش لباو نداء شعب السودان باش يذكّر العالم بقضيتو بعدما رسلو ليهم السودانيين عبر مواقع التواصل ميساجات باش يعرضو عليهم فـ التيران، ورفعو ميساجات فيهم: عتقو الشعب السوداني.

وبالرجوع لنتيجة الماتش، خدا الرجاء الرياضي بهذا الرباح 3 نقاط مهمة خلات الفريق ياخد الصدارة مؤقتا برصيد 15 نقطة مع المغرب الفاسي، في انتظار نتيجة ماتشات الوداد والجيش الملكي ونهضة بركان اللي مؤجلين.

إقرأ الخبر من مصدره