گود سبور//
كايتسنى جمهور باريس سان جرمان الفرنسي والمغاربة كاملين يسمعو خيار الخير على النجم المغربي اشرف حكيمي اللي توعت البارح الثلاثاء، بعد تدخل الكولومبي لويس دياز لاعب بايرن ميونخ الألماني، فـ ماتش ضمن دوري أبطال أوروبا.
وخرج دانييل رييولو الصحافي بشبكة RMC الفرنسية، والقريب بزاف من باريس سان جرمان، وقال صباح اليوم الأربعاء على الحساب ديالو بموقع “X”: “كاينة اخبار كاطمن على اشرف حكيمي وهذا الشي مزيان بزاف”.
حتى لدابا ما كاينة حتى شي حاجة رسمية، ولكن كاين واحد النوع من التفائل الكبير بمحيط باريس سان جرمان كاتعكسو الأخبار والمعلومات اللي كاتنشرها وسائل الإعلام الفرنسية القريبة من النادي، ونفس الشي بالنسبة للمغاربة اللي مبررطين على اشرف حكيمي عندهم أمل كبير ان اللاعب يشارك فـ كاس افريقيا اللي مازال لها غير شهر تقريبا.