كود كازا//
الفيلم المغربي “ميرا” ديال المخرج نور الدين الخماري تم اختيارو يشارك فالمسابقة الرسمية ديال مهرجان “تالين الليالي السوداء” السينمائي (POFF) فإستونيا، اللي كيتعتبر من بين 15 مهرجان عالمي كبار معترف بهم من طرف الاتحاد الدولي لجمعيات منتجي الأفلام (FIAPF)، بحال “كان” و”البندقية” و”برلين”.
هاد المشاركة كتأكد المكانة اللي ولات عند السينما المغربية فالعالم، وكتعطي الفيلم فرصة باش يتعرف عالمياً كعمل فني مغربي بطابع إنساني عميق.
القصة كتدور على المدرية “ميرا”، لي عندها 13 عام، كبرات فدوار محافظ فجبال الأطلس المتوسط، وكتمرد على القواعد اللي كتحسها كتحكرها وكتسلب منها حريتها. كتلقى العوين ديالها فالأستاذة “لمياء” اللي عندها فكر متفتح، وجدّتها “زينب”. عاد الغابة والطبيعة لي كيشكلو ليها الملجأ الوحيد، والطيور رمز للحرية اللي كتحلم بيها.
الخماّري كيقول أن “القفص” فالفيلم كيرمز للقيود الفكرية والاجتماعية اللي كتحبس الإنسان، وأن ميرا تمثل الرغبة فالتغيير والتحرر.
الفيلم كيشكل رحوع قوي للخماّري بعد “Burn Out” فـ2018، وكيواصل فيه استكشاف قضايا الهوية والصراعات الفردية برسائل رمزية حول الحرية والأمل.
أما التوزيع، فهو تابع لشركة Concept Mena Group بقيادة سهام الفايدي، اللي أكدت أن هاد الاختيار إنجاز كبير كيعكس الموهبة المغربية والمكانة المتصاعدة ديال السينما الوطنية دولياً.