كود سبور//
نايضة فـ البارصا بسبب الصور اللي نشر النجم السابق ديالهم الأرجنتيني ليونيل ميسي وهو الداخل فـ تيران الكامب نو، بلا ما ياخد إذن من النادي باش يدخل له.
وحسب جريدة Sport الكتالونية القريبة من البارصا، فإدارة النادي تصدمو وهما كايشوفو ليونيل ميسي كايبوسطي اليوم الاثنين الصباح تصاور ديالو على إنستغرام فـ تيران الكامب نو، وهما ما فراسهم ما بتعاود.
الجريدة قالت ان إدارة البارصا حلو تحقيق باش يعرفو كيفاش دخل ميسي للتيران وشكون عاونو فـ هاد شي، حيث ما خداش موافقتهم.
نفس المصدر نقل معلومات من مصدر قريب من ليونيل ميسي، كايقول فيها ان ميسي دخل بوحدو للتيران وتصور وما عاونو حد.