گود سبور//
تدرب الدولي المغربي عبد الصمد الزلزولي غير بوحدو اليوم الاثنين، قبل ماتش غدا الثلاثاء د المنتخب الوطني المغربي ومنتخب أوگندا.
وسالاو لاعبين المنتخب الوطني المغربي التداريب ديالهم قبل مواجهة اوگندا، ودارو اليوم الاثنين حصة تدريبية اخيرة كاتسبق المباراة كانت فـ تيران القرية الرياضية لطنجة، وفـ هاد الحصة ترينا عبد الصمد الزلزولي بوحدو ودار تمارين انفرادية بلا گروب.
وكان عبد الصمد الزلزولي حس بشي ألم فـ الشوفيا بسبب إصابة قديمة ومشى دار الفحوصات الطبية بمصحة فطنجة، وتبين أن ما عندوش شي حاجة واعرة، في انتظار قرار الطاقم الطبي والمدرب وليد الركراكي واش يقدرو يلعبوه ضد أوگندا ولا يخليوه يرتاح.
ولاعبين المنتخب الوطني المغربي غدا الثلاثاء ضد منتخب أوگندا فـ تيران طنجة الكبير مع 8 الليل، وهذا الثاني ماتش أميكال للأسود فـ هاد التوقف الدولي بعد ماتش موزمبيق الجمعة الماضية اللي ربحوه بواحد لزيرو.