گود سبور//
غالبا غادي يمشي الدولي المغربي سفيان بوفال من فريق روايال أونيون سان جيلواز البلجيكي، حسب ما كشف عليه الإعلام تما فـ بلجيكا، وهذا الشي وسط هضرا كاتروج على اهتمام الرجا والوداد بالخدمات ديالو وإمكانيات يجي يلعب مع فريق فيهم كيفما وقع مع حكيم زياش اللي سنا مع الوداد.
وكشف موقع “سود انفو” البلجيكي أن علاقة سفيان بوفال مع فريق روايال أونيون سان جيلواز ماشي هي هاديك، واخا أنه تألق فـ شي ماتشات مؤخرا، ولكن هوما ما عاجباهمش الإحصائيات ديالو داكشي علاش ما كايعتامدوش عليه كأساسيّ، وبالمقابل ف اللاعب باغي يلعب رسمي وكايشوف أنه عندو من الإمكانيات باش ياخد الرسمية، وأنه واخا كان توعت مع نهاية الصيف الماضي وتسبب له هذا الشي فـ الغياب على عدد من الماتشات، فـ المقربين منو دابا كايقولو أنه رجّع اللياقة البدنية ديالو كاملة وأسابيع هادي، ولكن مازال الوقت اللي كايتعطاه ما كايتزادش.
نفس الموقع قال إن سفيان بوفال ما عاجبوش الحال حيث ما كايلعبش بزاف، خصوصا وأنه كان عندو التزام بمشروع النادي ملي سنا معهم صيف 2024، وأنه وقف مع الفريق فـ وقت صعيب الموسم الماضي،
وحسب مصدر من النادي فـ هما كايركزو على الإحصائيات بشكل وسفيان بوفال ما قويش فـ هاد النقاط، ويمكن كايبان لهم أنه كايدافع بشكل أقل من اللاعبين الآخرين اللي معه فـ الفريق، وأنه اللي باغي يلعب خاصو يدير جهد كبير دفاعيا وهجوميا وبلي هذه الصفات بوفال گاعما قوي فيها.
سفيان بوفال عندو عقد مع روايال أونيون سان جيلواز البلجيكي حتى يونيو 2026، ولكن حسب نفس الموقع فغالبا ما غاديش يكمل مع الفريق حتى لهذا الموعد، وغالبا غادي يقلب على حل باش يخرج بحالو خلال الانتقالات الشتوية القادية فـ يناير الجاي.
وكاتجي هذه الأخبار فـ الوقت اللي كاين حديث فـ الشارع الرياضي المغربي وبالضبط فـ كازا، عن تنافس رجاوي ودادي على التوقيع مع سفيان بوفال، وأن الفراقي بجوج مهتمين به وممكن يدخل للبطولة فـ شهر يناير الجاي كيفما وقع من حكيم زياش اللي وقع قبل أسابيع مع الوداد.