كود- عثمان الشرقي //
المنطقة ديال تماسينت، فإقليم تنغير، كتسقبل تصوير بعض المشاهد من الجزء الثاني ديال الفيلم الأمريكي The Promised Land (“الأرض الموعودة”). هاد الشي كيبين بلاصت المغرب فالعالم كوجهة مفضلة لشركات الإنتاج هوليوودية وكبيرة.
المنطقة غادي تعرف أيام تصوير مشاهد من السبع حلقات الأولى للفيلم، فتنسيق مزيان بين الطاقم الأجنبي والسلطات المحلية والإقليمية، اللي عطات كل الدعم اللوجستي باش يسهلوا التصوير وتنجح التجربة.
الشركة الأمريكية MILK & HONEY STUDIOS, LLC غادي تصور مشاهد أخرى فمراكش، حربيل، سيفر، تامنصورت، الصويرة، أرفود، ورزازات، آيت بن حدّو والريصاني، والتصوير غادي يكون من 1 شتنبر حتى 31 دجنبر 2025.
الفيلم الأصلي The Promised Land اللي خرج فـ2012 من إخراج غاس فان سانت وبطولة مات دايمون وجون كرازينسكي، كيهضر على قضية اجتماعية وبيئية فمريكان، على موظف فشركة طاقة كيمشي لمدينة صغيرة باش يقنع الناس يبيعو حقوق التنقيب على الغاز الصخري.
الجزء الثاني اللي تصور فالمغرب غادي يكمل القصة من منظور جديد، كيخلط بين الصراع الإنساني والبحث على “الأرض الموعودة” بالمعنى الوجودي، واستعمال المناظر الطبيعية المغربية اللي كتجسد رمزية الصحراء والواحات كمكان للتأمل والتغيير.
الناس المحليين فرحانين باللي المناطق ديال الجنوب الشرقي تختارت باش يتصور الفيلم، وكيعتابرو هاد الخطوة “كتعكس الثقة اللي كيتلاقاو بها المواقع المغربية عند كبار المخرجين . السياحي لواحة دادس الكبرى، وكيخلق حركة اقتصادية فالمجال المحلي بحال الإيواء والنقل والخدمات المساندة، وكيتشارك فيها عدد من الشباب والتقنيين المغاربة فالطاقم الفني.
الفعاليات المحلية كتأكد باللي تصوير الأرض الموعودة 2 فتنغير كيقوي مكانة الإقليم على الخريطة ديال السينما الدولية، وكيحل الباب لمزيد من الاستثمارات الثقافية والسياحية فالمنطقة.