محمد سقراط-كود///
بالنسبة ليا واحد من أكبر المشاكل في المغرب هو ندرة العمالة الماهرة، كتلقى واحد خدم مع ميكانيك شهرين غير كيتسخرليه ويجيب ليه السوارت، حتى لواحد النهار كيحل محال ويكتب عليه ميكانيك السلام اصلاح جميع أنواع السيارات، طبعا فاش كتمشي عندو كيصاح ليك موشكيل ويخلقليك وجوج مشاكيل جداد، بعد المرات راه شي أعطاب او صيانة دورية بسيطة وكاين العرباز لي يخربقها، فيدونج مثلا لي اسهل مكاين وخاص تبقى ديما حاضي مع الميكانيك ليدير الزيت كثر من القياس او ميزيرش الفيلتر، وكذلك في المهن كلها تقريبا، صعيب تلقى نجار او حرفي كيما كان معقول وعندو الحرفة فيديه وخدمتو متقونة وتمشي راضي، وفاش كيكون شي واحد فيه هاد المواصفات كتلقاه ميحكش راسو وكيمشي مزيان في الحياة الى خدم المعقول طبعا.
راه حتى في العروبيات وغي الشوانط قلالو الخدامة كاين خصاص كبير، وفي نفس الوقت كاين شباب بطالي ماقاري معندو صنعة معندو حرفة او مهارة أيا كانت، وهاد الظاهرة ولات حتى في البوادي، شباب مابغاوش يسرحوا ويعيشوا حياة الماعز والى دارو هادشي، كيفضلو يبيعو حقهم في البلاد ويهاجرو بيه ويضربوا تمارة في حقول اسبانيا هي لي تستحق المجهود بالنسبة ليهم، والصراحة معاهم الحق، تخايل انه منطقتنا في الرحامنة كتعرف الجفاف سنوات هادي والفلاحة ميتة والكسيبة قلالت، ومع ذلك المستثمرين في المنطقة مميلقاوش الخدامة وحاليا كاين الافارقة جنوب الصحراء هوما لي خدامين في بزاف ديال الفيرمات والبني وخدمة التكرفيص وحياة الماعز وبلا وراق بلا حقوق بلا خلاص يضمن العيش الكريم وهذا هورالموشكيل الحقيقي.
أغلب صحاب المشاريع الصغرى او المتوسطة كتلقاهم كيتشكاو من الخدامة، في النفس الوقت باغين يخدموا شباب قاريين وواعيين ومعقولين ولكن في ظروف مزارع القطن في الجنوب الأمريكي أيام العبودية، بلا وراق بلا حقوق، بلا ظروف عمل إنسانية وبجوج فرنك حرفيا، هاد ظروف العمل بزاف ديال الشباب كيفضلو البطالة عليها، وهذا حاليا راه موشكيل كبير خاص الدولة تلقى ليه حل، أي واحد خدام فشي قنت خاص يكون بوراقيه وحقوقوا، واخا يكون كيفلي الكلب بالنص، السارح خاصو يولي يخدم بعقد عمل يصون حقوقه كإنسان قبل كل شيء، راه لا يعقل تلقى مطعم فاخر ونص الخدامة بلا وراق واكلهم في رزقهم، او أي مشروع، خاص لجان مراقبة تدور وتفرق الغرامات بحال لي كيوقع في الدول لي كتحتارم راسها وشعبها، طبعا غادي يبقى النوار ولكن غادي يقلال ماشي بحال دابا راه النوار هو الأصل.