وكالات//
فواحد القصة اللي كتعاود ترسم حدود الإبداع، سجلّات العازفة الجابونية مانامي إيتو اسمها فموسوعة غينيس كأول وحدة فالعالم كتعزف الكمان باستعمال ذراع اصطناعية كاملة، وهاد الإنجاز النادر تزاد من شغف ما كيطفاشش.
فـ2004، فقدات إيتو الذراع اليمنى ديالها فحادث سير اللي قلّب حياتها كامل، وظنّات فداك الوقت أن الحلم ديال الموسيقى سالا. ولكن ملي شافت مرضى كيستعملو الأطراف الاصطناعية باش يمارسو الرياضة، تبدلات نظرتها وكانت هاديك اللحظة هي نقطة التحوّل اللي رجعاتها للكمان من جديد، ولكن هاد المرة بطريقة مبتكرة.
طوّرات إيتو أسلوب عزف خاص بها، كيعتمد على حزام وكابل كيدورو على كتافها من الجهة اليسرى، وكيعطيوها القدرة تتحكّم فالقوس بدقة كبيرة.
وتصمّم ليها حتى قوس اصطناعي خفيف كيناسب الاحتياجات الفنية ديالها، باش ترجّع أصابعها تستنطق الأوتار بنغمات عندها بصمتها الخاصة.
ودخولها لموسوعة غينيس ما كانش غير رقم قياسي، ولكن محطة رمزية كتعبّر على سنوات ديال التدريب المستمر والانتصارات الصغيرة اللي بنات قصة نجاح كبيرة.