كود كازا ///
عرفات سيدي رحال الشاطئ، اليوم الاحد، حادث مؤلم بعدما تعرض واحد عامل نظافة للدهس بشكل عرضي من طرف زميلو فالخدمة، وهو السائق ديال شاحنة جمع النفايات، فالوقت اللي كانو كيديرو الخدمة اليومية ديالهم.
وحسب شهود عيان، السائق كان كيحاول يرجع الشاحنة للورا بلا ما ينتبه باللي زميلو كاين خلفها، الشي اللي تسبب فدهسو بلا عمد، وخلا العامل يصاب بكسر فالرجل ديالو.
ومباشرة من بعد الحادث، التحقت السلطات المحلية لمكان الواقعة، وحضرو عناصر الدرك الملكي وسيارة إسعاف تابعة للجماعة، اللي تكفلات بنقل المصاب للمستشفى باش يتلقى العلاجات الضرورية. وفي المقابل، تْفتح تحقيق من طرف المصالح المختصة باش يتعرفو على تفاصيل وملابسات هاد الحادث.
هاد الواقعة كتعاود تطرح للنقاش أهمية تعزيز شروط السلامة المهنية وتوفير وسائل الحماية للعمال اللي خدامين فهاد المهن الخطيرة.