سهام البارودي ـ كود//
فالعالم كامل لاسولتي أي شاب علاش باغي يدير لاباس غايقوليك باش نصوڤي راسي، نعيش حياة كريمة ولا كان عندو أسرة ووليدات غايقوليك باش وليداتي يكبرو فظروف أحسن، ونوفر ليهم داكشي لي ماكانش موفر ليا.
وهادي هي القاعدة العامّة، الثروة كاتكوّن من جيل لجيل، نتا كاتخدم على ولادك وولادك كايخدمو على ولادهم وهكذا دواليك، نتا كاتكون عندك محل ديال النجارة مثلا، كاتقاتل باش ولدك يولي أستاذ وولدك كايتقاتل باش ولدو يكون طبيب والطبيب كايولد اولاد و كايقريهم ويوفر ليهم الظروف باش يورثو منو الكابيني ولا يكونو رجال أعمال، وهادشي كانشوفو فالعائلات الكبيرة كاتلقى ديك الثروة ديالهم كاتزيد وكاتنتاعش من جيل لجيل، جد جدو كايكون تاجر معروف وولدو تاهوا تاجر معروف والأحفاد رجال أعمال وكل جيل كايزيد فديك الثروة العائلية باش يعاون الجيل لي جاي من موراه.
إلاّ فالمغرب، عوض الإنسان يشوف لقدّام كاتلقاه كايشوف لّاور، كاتسولو علاش بغيتي دير لاباس؟ كايقوليك باش نصوڤي واليديا! ولاش غاتصوڤي واليديك؟ مال واليديك أصلا ماصوڤاوش راسهم قبل مايولدوك ولا كايعرفو غا يبلزو؟
لي بزّاف د الناس مامستوعبينوش أنه المستوى المادي ديال واليديهم ماشي مسؤوليتهم، واليديك اذا كانو مزاليط راهم اختارو بشكل او بآخر أنهم يكونو مزاليط ويعيشو فالزلط، مادارو تجارة فالوقت لي كان البيع والشرا محرّك، ماقراو فالوقت لي كان غا الشهادة الابتدائية تقدر تخدم بيها مع الدولة، مادارو والو باش يحسنو المستوى المعيشي ديالهم، صافي الدّور ديالك أنك تصوڤي راسك بعدا حيت أصلا تزاديتي فبيئة مامساعداكش يعني احسن حاجة يمكن ديرها هي نتا بعدا تصوڤي هادي هي الأولوية ومن موراها تصوڤي ولادك والجيل لي جاي موراك هادي هي الأولوية الثانية عاد نشوفو الواليدين لاكانو طبعا يستاهلو أنك تفكّر فيهم وكنتي باغي تفكر فيهم، ماشي واجب عليك إنما جونتيييس منّك.
هاد الضغط لي كايعيشو فيه بزّاف ديال الشباب، راه ماشي موتيڤاسيون غاتزيد بيهم القدّام اكثر ماهي ستريس كايضيع ليهم وقتهم وطاقتهم، كاتلقى الإنسان يا الله هز راسو مسكين وضبّر على خديمة ياكل بيها طرف د الخبز ولكن عوض أنه يتهلى فراسو ويخسر على راسو ويعوض راسو على السنين العجاف لي عاش مع واليديه، كاتلقاه مضطر أنه يقسم داكشي لي عندو مع واليديه وخوت تاهوما مقودة عليهم كايصدق ماعمرو يربّي الرّيش حيت هاز مسؤولية كبيرة عليه، ماعمرو يزيد لقدّام حيت كايصلح أخطاء الماضي وكايشوف اللُّور.
الإنسان لا ماعندوش استقلالية مادية ودخل قار ومسكن قار بلا راه أنانية منُو أنه يولد الاولاد ويساينهم يعتقوه من الزلط لي فشل يعتق راسو منُّو.