محمد سقراط-كود///
واخا هاد الأوراش الكبرى وهاد طريق التنمية لي حقيقة غادي فيها المغرب، غاهو علاش الدولة باقا ضعيفة بزاف في تطبيق القانون؟ أبسط حاجة وهي الكاسك لصحاب الماطر تاواحد مكيديرو وغادين جايين قبالة البوليس وها لي مركب تلاتة وهانية، مظاهر التسيب كثيرة وغير منطقية بالنسبة لدولة كتعتابر راسها غادا في الطريق الصحيح للحاق بالحضارة الأوروبية، كاين دول في آسيا فيها ملايين الماطر ومع ذلك شبه مستحيل تشوف شي واحد بلا كاسك، وماشي أي كاسك بل كاسكات لي محتارمين معايير السلامة، والغرامات الغالية بزاف كتوصل حتى لسبعمية درهم في ماليزيا مثلا، وأندونيسيا واصلة حتى لشهر دالحبس في حالة التكرار، وهادو راه بلدان كبيرة ناسها كيعتامدو على الدراجات في التنقل ومع ذاك قادرة تظبطهم وتخليهم يحتارموا القانون.
بينما هنا راه العشوائية جنبا إلى جنب مع الاوراش الكبرى لي براسهم كتشملهم العشوائية، العديد من هاد الأوراش بعمال بلا ملابس الوقاية بلا كاسك بلا جيلي ، شنو لي كيخلي المغرب ساحة لهاد تمظهرات العجز على تطبيق القانون من طرف الدولة وعدم احترامه من طرف المواطنين، وقف حدا أي ضو حمر مكاينش حداه بوليسي، وحسب شحال من واحد يوميا كيحرق الضو، شحال من واحد كتلقاه مدرم في الاتجاه المعاكس، بلا منهدرو على لي واقف وسط طريق رئيسية باش يتقدى كوميرة او يتسنى ولدو من المدرسة، راه أهم ركائز الدولة الحديثة هو فرض احترام القانون وهادشي لي عاجزة عليه الدولة المغربية لحد الآن، وهادشي لي كيخلي أغلب المدن المغربية عبارة على ساحات مصارعة بين هرگاوة وبعيدة كل البعد على المدنية.
المجهود لي كتبدل الدولة في الأوراش الكبرى خاص تبدل الضعف ديالو في تطبيق القانون وتعليم المغاربة احترامه، الشعوب المتحضرة لي كيتعطى بها المثال في احترام القانون راه متخلقوش هكاك، بل الدولة فرضات عليهم احتراموا بالغرامات والعقوبات والصرامة ديال مطبقي القانون، حنا باقي خدامين بالحركات المخزنية، داكشي ديال حملة على الكاسك فيها سيمانة دير فوق راسك كاميلة او كاسك ديال بيكالة او كاسك ديال مية درهم ماصالح لوالو ودوز، كتسالى الحملة كيرجع كولشي كيف مكان، كذلك مع تحرير الملك العمومي ومع تعديل محركات الدراجات النارية، وبحال حملة زيرو ميكة، وعموما ديما الحملة وصافي، وطبعا بلا نتيجة وفي اللخر هاهي البلاد كتعيش تحديث عدك قطاعات ولكن شبعانة مظاهر ديال الدول المتخلفة وأولها احترام قانون السير.