كود سطات ///
عرفات المديرية الإقليمية للفلاحة بسطات فهاذ الأيام حركة كبيرة، بعدما استقبلات أكثر من 1000 كساب جاو من مختلف جماعات الإقليم باش يقدمو الشكايات ديالهم المرتبطة ببرنامج دعم الكساب. هاد الإقبال الكبير دار ليه تنظيم محكم، بحيث أكد المدير الإقليمي “يونس اعتاني” باللي الاستقبال كيدوز فظروف مريحة بزاف وببرمجة يومية كتراعي التقسيم ديال الدواوير والجماعات.
ومنذ فاتح نونبر، بزاف ديال الكسابة عبرو على الارتياح بعدما توصلو برسائل قصيرة كتأكد أنهم من بين المستفيدين. هاد الدعم كيتكون من:
دعم مباشر باش يشريو العلف
تسبيق مالي للحفاظ على إناث الماعز والأغنام المخصصة للتوالد
هاد الشي خلا المئات منهم يتوجهو لوكالات الأداء باش ياخذو مستحقاتهم.
وباش المديرية تقدر تستقبل هاد العدد الكبير بلا ازدحام، تخصصات خمسة مكاتب مجهزة غير لمعالجة الملفات وتتبع الشكايات، وهاد التنظيم ساهم بزاف فالسرعة وتفادي الفوضى.
هاد الشكايات مقسمين لـ4 أصناف
على حسب تصريح يونس اعتاني، الشكايات اللي كتدخل للمديرية كتتقسم لـ4 أصناف:
شكايات ديال الترقيم، شكايات ديال الإحصاء، مشاكل ديال صرف الدعم وملاحظات على احتساب المبالغ.
هاد الشكايات كتمشي للجنة الإقليمية اللي كتترأسها السلطة الإقليمية وكتضم كل مكونات لجنة الإحصاء، باش تكون المعالجة دقيقة وشفافة.
الأرقام اللي تسجلات هذ الأيام كتبرز أن الإقبال كبير بزاف، بحيث تعدى العدد ألف كساب، الشي اللي فرض تنظيم صارم باش كلشي يدوز فظروف مزيانة.
المديرية الإقليمية كتأكد أن الخدمة مازالت مستمرة باش تتعالج جميع الشكايات، وكيستافدو الجميع من الدعم في أقرب وقت، فإطار برنامج وطني الهدف ديالو مساندة الكساب وتخفيف آثار الجفاف على القطاع.
