كود كازا//
ولد زيان أكد فتصريحو “لݣود“ أن باه متمسك بالقرار الشخصي ديالو بالدخول فالإضراب عن الطعام، وانه ماشي ملزم يبلغ أي جهة ،وكمحامي موكلو ايستند على الفصل 120 من القانون اللي كيقول باللي العقوبة الأشد هي اللي كتتنفذ فحالة وجود جوج ملفات، وكيعتابر أن العقوبة ديال زيان الاب سالات وأن استمرار الاعتقال ماشي قانوني.
للتذكير، الوكيل العام للملك بالرباط شدد فبلاغو أن زيان متابع فجوج ملفات مستقلة، الأولى خذا فيها 3 سنين وسالات فـ21 نونبر 2025، والثانية بدا فيها الاعتقال الاحتياطي فـ10 يناير 2024، وصدر فيه حكم استئنافي فـ7 ماي 2025 بـ3 سنين إضافية، والحكم مطعون فيه بالنقض. النيابة أكدت أن الاعتقال باقي قانوني حتى تستنفد جميع مراحل الطعن، وذكرت أن طلب الدمج اللي قدمه الدفاع كيبين وجود حكمين مستقلين.
للإشارة، المندوبية العامة للسجون أوضحات أن زيان ما دخلش فإضراب عن الطعام وكياكل بشكل طبيعي، وما وصلها حتى إشعار رسمي بالإضراب. كما نبهات أن تصريحات ولد زيان فيها تناقض مع الوقائع، وهادشي خلق ضبابية فالمعلومات اللي وصلات للرأي العام.
مصادر لݣود أكدات انلي غايحسم فالملف القانوني ديال زيان هي محكمة النقض، حيث غادي تقول كلمتها وتحدد مصير الملف بشكل نهائي. وأي قرار غادي يصدر منها هو اللي غادي يوضح القانونية ديال الاعتقال ويسد باب التأويلات والشائعات المنتشرة وسط الرأي العام.