كود الرباط//
عبد الإله بنكيران، زعيم البي جي دي، جبد اليوم الاحد فلقاء الحزب بالجهة الشرقية، جزء من تاريخ ومسار علاقة الحزب ديالو بالدولة، وبأقوى مستشار سياسي فالمملكة فؤاد علي الهمة.
بنكيران واخا هضر بانحياز لتصوره السياسي والحزبي ف العلاقة مع حزب الأصالة والمعاصرة وحركة لكل الديمقراطيين، أكد بلي المشكل بينو وبين فؤاد علي الهمة كلها ف مصلحة الملكية والبلاد. وقال بلي الهمة كيشوف هاد المصلحة وفق طريقتو وأنا كنشوفها بطريقتي.
وهاجم بنكيران حركة لكل الديمقراطيين وقال بلي تجمع فيها كولشي ضد البي جي دي، ودارتو عدو.
وقال بنكيران بلي فاش كان علي الهمة فاعل سياسي واجهناه قبل ما يكون مستشار، وملي كان مستشار ملكي وقرناه، مضيفا يلا خرج عاود للسياسة للمواجهة مستعدين له.
وذكر بنكيران فاش وصفهم الهمة بهوامش المجتمع، وتواصل القصر مع البي جي دي وخبرهم بلي هاديك وجهة نظر تخصه ولا تخص القصر وبلي يلا بغاو يردو عليه من حقهم، لذلك صيفطو عزيز الرباح لدوزيم يرد، وفق بنكيران. غير هاد الرد على قد الحال حسب ما قال بنكيران اليوم.
بنكيران قال كذلك: “لعل الهمة حاليا يدير السياسة من وراء حجاب.. الله أعلم.. إلى وقرنا مزيان وإذا نزلتي للسياسة من جديد ما تسنا منا غير نتواجهو معك”.