كود احمد الطيب ///
الفيديو الفضيحة ديال لجنة الاخلاقيات التابعة للجنة المؤقتة لتسيير شؤون الصحافة والنشر ماشي غير شوه لبلاد وزلزل قطاع صحتو على قدها، بل خربق مؤسسات كيشرف عليهم شي وحدين كانو ابطال =ماشي بصاح ابطال= داك الفيديو. “كود” سولات صحافيين وصحافيات فاليومية المعروفة “الصباح” على تداعيات ظهور مدير النشر اليومية اللي بان فالفيديو مرة كيسب المحامين ومرة كيتباهى بتحكمو فالقضاء ومرة كيتباهى باسلوبو المنحط “التشيطين” و”عيو” و”اكش اكش”. صحافيون شددو على انهم كيرفضو ما جا فالفيديو وباللي كيتسناو القضاء يكش فعلى القصة كلها
اللي هدرات معاهم “كود” طبعا كلهم فضلو ما يكشفوش على اسماءهم. تعرفو السبب. خايفين منو. اييه خايفين من مدير نشرهم وعضو اللجنة المؤقتة اللي تسبب فاكبر شوهة عرفها القطاع. قالو ل”كود” باللي كيخافو منو. طبعا عاودو ل”كود” كيفاش شي مسؤولين ومصادر ديالهم ما بقاوش يتعاملو معاهم. بداو يهملوهم. احدهم قال ل”كود” باللي ما عمرو فحياتو المهنية الطويلة شعر بهاد الاحساس ديال الناس كتجبد ليه غير هاد الموضوع او كتفاداه.
بعض من اللي هدرات معاهم “كود” قال باللي حتى انتاجو نقص من تداعيات اللي وقع
باش سولاتهم “كود” علاش ما يفعلوش بند الضمير او يراسلو المولوي اللبناني اللي كيسير الجورنال، ردو “باللي كاين شي وحدين كيفكرو فتفعيل بند الضمير، بخصوص فكرة مراسلة المولوي رفضها الجميع. السبب. ما كيتيقوش ابدا فالمولوي. “راه هو اللي جابو. هو اللي دعمو. هو اللي كان كيقول باللي كيجيب ليه الاشهار وكيجيب ليه الدعم…..عادي غادي يكون معاه”
حتى زهير بناني مول “كارفور” اللي مساهم فالمؤسسة الصادرة ل”الصباح” ما كيتيقوش بيه “نهار اللي كان مولوي مضارب مع الحري وبغى يجري عليه. راه بناني اللي دعمو. راه تقوى بهاداك مول كارفور”
دابا الصحافيون خايفين بزاف من اصرار هاداك مدير النشر بطل فضيحة الفيديو مول “التشيطين” اللي سب المحامين واهان حرمة القضاء……ما فاهمينش كيفاش رغم الزلزال مازال باغي يبقى على جورنال اللي ممكن غدا تقاطعو الشركات وتوقف الاعلانات وما تبغيش منتجاتها مقرونة باسم مؤسسة مدير نشرها بان ففيديو وشوه بالقطاع.
دابا مؤسسة محترمة بصحافيين وصحافيات مشهود ليهم بالمهنية ومعروفين باخلاقهم ولاو حاصلين بسباب اللا موقف اللي دارو مولوي وزهير بناني