گود سبور//
أكدت جريدة “ليكيب” الفرنسية، الخبر اللي كان نشراتو “گود” فـ وقت سابق، بخصوص الاتحاد الدولي لكرة القدم، والقرار ديالو بشأن موعد التحاق اللاعبين الأفارقة بالمنتخبات ديالهم المشاركة فـ كاس إفريقيا “المغرب2025”.
“گود” كانت نشرت بلي الفيفا قررت السماح للأندية بالاحتفاظ باللاعبين ديالها الأفارقة المشاركين فـ كاس أفريقيا حتى ليوم 15 ديسمبر 2025، أي قبل 6 أيام من انطلاق بطولة كاس إفريقيا “المغرب2025″، واللي غادي تبدا يوم 21 ديسمبر 2025، وقالت الجريدة إن الفيفا دارو الخاطر للأندية الأوروبية.
“ليكيب” نشرت نفس المعلومة اليوم الثلاثاء، وقالو إن قرار الفيفا جا بعد ضغط من رابطة الأندية الفرنسية، وهذا الشي تقرر فـ واحد الاجتماع كان يوم 29 نوفمبر الماضي، وبلاما يعلمو الاتحادات المعنية، اي اتحادات المنتخبات الإفريقية المشاركة فـ كاس أفريقيا.
هذا المشكل ديال إقامة كاس إفريقيا وسط الموسم، الصراحة ديال الاتحاد الافريقي لكرة القدم، اللي كل مرة كايبدل موعد إقامة البطولة مرة فـ الشتا ومرة فـ الصيف وما عندوش موعد قار، وبالمقابل الأندية وخصوصا الأوروبية، كاتدافع على مصالحها، حيث متعاقدة مع لاعبين بملايين اليوروات، وصعيب عليها تسمح فيهم وسط الموسم، أما المنتخبات الإفريقية فحتى هي ضحية ديال هذا الشي من جهة أخرى حيث كيفاش منتخب افريقي غايدير يجمع لاعبين قبل 6 أيام من انطلاق كاس إفريقيا وغايوجد باش يلعب البطولة وينافس عليها، بلاما يلعب ماتشات وديين وما عندو حتى الوقت باش يخلق الانسجام.