أنس العمري – كود///
فالدورة الاستثنائية لي عقدها مجلس مدينة الدار البيضاء البارح الثلاثاء، خرج الحسين نصر الله، نائب عمدة المدينة المكلف بممتلكات الجماعة، بمعطيات صادمة ووجهة كلمات قوية لكل اللي كيتلاعبو بأملاك المدينة، مخاطبا إياهم قائلا “لن نسلمكم عقارنا.. حتى متر واحد ما غادي يدي”.
https://www.facebook.com/share/v/1Bhf3agap1/?mibextid=wwXIfr
وبداية، شكر نصر الله “جميع المستشارين اللي عندهم غيرة على الأملاك الجماعية، وقال باللي هاد الغيرة مهمة بزاف، لكن للأسف ماشي عند الجميع”، مضيفا “كاينين بعض علوج السياسة اللي كيلعبو اللعب ويطلقو الاتهامات الباطلة عن قصد، ربما باش يقيّصو مصالح ديال الناس”.
وذكر، في هذا الصدد، بما جاء على لسان وزير الداخلية، عبد الوافي لفتيت، خلال مناقشة ميزانية وزارة الداخلية بمجلس النواب، والذي توعد كل من سطى على بقعة أرضية في ملك الجماعات الترابية، أو اختلس ولو درهما، بالمحاسبة قائلا “لي دا شي طرف د الأرض، أو درهم واحد خصو يردها لأنه غادي نوصلوا مع لخزيت”.
وقال نصر الله، في هذا السياق، “فالدار البيضاء غادي على هاد النهج منذ مدة”، مؤكدا، بلهجة قوية، “لي دار شي ميترو غادي يرجعو، واللي اختلس شي فرانك غادي يرجعو”.
وكشف باللي “كاينين شخصين كيرجعو الفلوس دابا، واحد رجع 4.5 مليار، والثاني حوالي 1.3 مليار، وكاين اللي باقي غادي يرد الفلوس”، موضحا “هنالك شكايات لدى النيابات العامة ضد الأشخاص لي داو الفلوس للجماعة”.
ولم ينس نصر الله الإشارة للقضايا العقارية القديمة، مبرزا، في هذا الصدد، “نادي الفروسية اللي 70 سنة كيستغل فيه الأرض، تم انتزاع حكم بالإفراغ، ورفعا دعاوي بشأن محلات في شارع الزرقطوني كتكري هاد الفضاءات بـ150 درهم هادي 43 سنة”.
وأضاف “لغينا 47 مليار سنتيم ديال الأحكام الي كنت فيها قرارات محكمة النقض. وبالمناسبة راه هذا المبلغ يعادل مرتين ميزانية مقاطعات الدار البيضاء”.
أما بالنسبة للقضية العقارية ديال مقاطعة عين السبع، فقد فسر نائب عمدة كازا كل مراحل التعاطي مع الملف، من بداية تحويل ملكية قطعة أرض من اسم الجماعة لشركة خاصة، حتى آخر التطورات اللي عرفها الموضوع، مؤكدا باللي الجماعة لن تتنازل عن أي حق.
وكانت “كود” أثارت موضوع أملاك الجماعة القديمة والجديدة فالعديد من المناسبات، ونشرت معطيات صادمة بخصوص هاد الملف.
يشار إلى أن هاد الجلسة صادق فيها مجلس جماعة الدار البيضاء بالأغلبية على إحداث شركة المنشآت الرياضية للدار البيضاء (CASAREGIONSPORT).
وتروم هذه الخطوة تعزيز البنيات التحتية الرياضية للمدينة وتطوير مرافقها العمومية، ودعم الأنشطة الرياضية والثقافية بمختلف المقاطعات، وبالتالي المساهمة في تحسين جودة الخدمات المقدمة للساكنة المحلية.