گود سبور//
مرة مرة كايطيحو الداعمين لحملات مقاطعة منتوجات الشركات الميريكانية بداعي أنها كاتمول إسرائيل اللي داخلة فـ الحرب ضد فلسطين، (كايطيحو) فـ التناقض، وهاذ الشي اللي وقع لقطر اللي مستاضفين هاد الأيام كاس العرب 2025.
قطر الدولة اللي كاتقدم راسها على أنها داعم للقضية الفلسطينية ومحتاضنين حماس فـ بلادهم، وكايوجهو الإسلاميين واليساريين فـ دول شمال إفريقيا، لتبني خطاب الممانعة والمقاطعة، طاحو تاني فـ موقف صعيب، وهذه المرة بسبب سبونسور ديال كاس العرب 2025، المسابقة اللي منظمها الاتحاد العربي فـ التيرانات القطرية هذه الأيام.
وأي واحد متبع ماتشات كاس العرب هاد الأيام والندوات الصحافية ديال مدربي ولاعبي المنتخبات العربية، غادي يلاحظ الإشهارات ديال شركة “كوكاكولا” الميريكانية، طبعا هذه الشركة هي سبونسور ديال الاتحاد العربي لكرة القدم والإشهار ديالها كاين فـ كاس العرب، ولكن هذا الشي كامل كاين فوق الأراضي القطرية.
طبعا الاتحاد العربي لكرة القدم هو اتحاد كرة مستقل ومن حقو يوقع مع السبونسور اللي بغا، ولكن حتى الدولة اللي مستاضفة الحدث من حقها تعتارض على شي سبونسور ديال البطولة العربية إلى ما كانش عاجبها حيث ارضها هاديك، ولكن قطر مخلين الأمور دايزة مزيان فـ البطولة العربية، وشركة “كوكاكولا” حاضرة فـ كاس العرب من قلب ملاعب قطر وكلشي مزيان والقطريين ما يمكنش يديرو شي خطوة اللي تسيء لهم او تخسّر البطولة العربية اللي صارفين عليها الملايين من الدولارات إعلاميا على الأقل باش يروجو شويا لصورة قطر.
وهذا الشي كايبين للمسروحين من الإسلاميين واليساريين أن خطابات الممانعة والمقاطعة، راه كاتبدل حسب المصالح وهذا الشي كل كايتستغل سياسيا وصافي وبنادم غير مدفگ حيث ما فاهم والو، وحارم راسو من شي منتوجات وماركات بهاد المقاطعة وعند بالو راه واخد موقف ومؤثر، ولكن هو راه ما عند الموقف ديالو حتى شي قيمة قدام المصالح ديال الدول مع العلم ان كوكاكولا راه كاتباع حتى فـ غزة وماشي غير فـ الدوحة.