كود – عثمان الشرقي //
قبل ما يبان سبوتيفاي وساوندكلود واليوتيب ، بزاف ديال أغاني الروك آند رول والبوب تعرّضات للرقابة و المنع فمريكان وبريطانيا و العالم الغربي ،فعلاش غايكونو كيهضرو هاد الاغاني لي تمنعو يدوزو فراديو، وكيفاش المنع زاد خلاهم مشهورين كثر ؟
Imagine – John Lennon
هاد الأغنية المعروفة لي كتغني على السلام وعالم بلا حدود، وبلا حروب، و الناس كلهم عايشين كي السمن مع العسل ،كلماتها دارت مشكل حيت “كتلغي البلدان والجنة والاديان وكتعتبر كفر ومضادة للوطنية فمريكان ،داكشي علاش تمنعات خصوصا قبل حرب الخليج الأولى ومن بعد 11 سبتمبر، المنع خلاها تولي أغنية رمزية كتمثل الأمل فالسلام العالمي، والناس مازالو كيسمعوها تال دابا.
Strange Fruit – Billie Holliday
الأغنية كتدين العنصرية فالجنوب ديال مريكان، عام 1939 تمنعات فأمريكا الجنوبية وأفريقيا الجنوبية فالوقيتة ديال أبارتايد، بيلي هوليداي ولات على “قائمة المراقبة” ديال FBI. هاد الأغنية كانت قوية ومؤثرة بزاف، حيث كتخلي المستمع يحس بالظلم والحكرة اللي عاشوها الضحايا، وولات رمز لمقاومة العنصرية بالموسيقى.
Like a Prayer – Madonna
الكليب فيه رموز دينية ومشاهد مثيرة ، وملي خرجات فMTV ف1989 خلقات غضب كبير، الأغنية تمنعات حتى فالفاتيكان وبعض القنوات والراديوات الغربية بحال BBC ، البابا يوحنا بولس الثاني انتقد هاد الأغنية لي خلات مادونا تولي أيقونة ديال التحرر، وورات كيفاش الفن يقدر يهضر على الدين والمجتمع بطريقة جريئة.
God Save the Queen – Sex Pistols
خرجات فالـ1977 وكانت ضد الملكية البريطانية، كلماتها اعتبروها سبّ للملكة،وتمنعات فبريطانيا خصوصا فالراديو الرسمي والصحف المحافظة، ولكن ولات رمز للمقاومة والثورة عند الشباب، الأغنية عاونات الشباب البريطاني يعبر على الغضب ديالو تجاه النظام، وولات جزء من ثقافة البانك اللي كتسخر من السلطة وتدافع على الحرية الفردية.
Cop Killer – Body Count
خرجت ف1992 وكلماتها كانت كتهضر على العنف البوليسي. تمنعات فأمريكا، خصوصا فالراديو والصالونات الكبار ديال الموسيقى، وخلقات البلبلة على حرية التعبير. هاد الأغنية خلات الناس يهضرو على المشاكل ديال البوليس والمجتمع بطريقة موسيقية صادمة، وخلقات نقاش على الحدود ديال الفن والكلمات اللي كتقدر تهدد النظام.
Relax – Frankie Goes to Hollywood
الأغنية فيها كلمات مثيرة جنسياً بزاف،منعاتها bbc فبريطانيا، ولكن هادشي خلاها تولي أكثر شهرة ومبيعاتها طلعات بزاف، المنع خلا الأغنية تدخل التاريخ وكتبقى متال على كيفاش الرقابة ممكن تزيد الفضول الشعبي، والناس بدات كتموسق لها باش يسمعو شنو فيها
I’m Too Sexy – Right Said Fred
الأغنية ، خرجات فالـ1991. تمنعات فبعض الراديوات فالعالم بحال أمريكا وأوروبا حيث اعتبروها مبتذلة،وخا المنع الأغنية ولات رمز فكوميديا البوب، والناس كيعرفوها حتى دابا كمثال على السخرية والطنز فالموسيقى العالمية.
Killing in the Name – Rage Against the Machine
أغنية عن التمرد ضد السلطة وكلماتها قوية بزاف، تمنعات فأمريكا وBBC فبريطانيا، هاد الأغنية ولات رمز للثورة ضد الظلم والاستبداد، وكل جيل جديد كيتعرف عليها كوحدة من أقوى الأغاني اللي كتدافع على الحرية.
Lola – The Kinks
أغنية كتهضر على قصة حب مثيرة بين راجل وامرأة، خرجت فالـ1970. تمنعات فبعض القنوات البريطانية بسبب كلماتها اللي اعتبروها مشكوك فيها جنسياً،هاد الأغنية خلات النقاش على الهوية والجنس والجندرية يقوى بطريقة فنية، وولات جزء من الثقافة الشعبية اللي كتضحك وتستفز الناس فالنفس الوقت.
I Want Your Sex – George Michael
أغنية مثيرة جنسياً بزاف فـ1987 تمنعات فالراديوات الأمريكية والبريطانية لبعض الوقت، وخلقات نقاش كبير على الموسيقى والرقابة. هاد الأغنية ورّات كيفاش الموسيقى ممكن تكون جريئة وتفتح مواضيع حساسة، وخلقات شهرة كبيرة لجورج مايكل بفضل روينة اللي دارها.