گود سبور//
تأهلت فلسطين وسوريا إلى ربع نهائي كأس العرب 2025 عن المجموعة الأولى من البطولة المقامة حاليا بقطر، بعدما قصاو المنتخب التونسي والقطري.
الماتش بين فلسطين وسوريا عن المجموعة الثالثة من دور مجموعات كأس العرب سالا قبل لحظات من مساء اليوم الاحد بنتيجة التعادل السلبي زيرو لزيرو، وكان المستوى ضعيف بزاف والمنتخبين بجوج كانو متحفظين وما باغيينش يهاجمو لدرجة أنه ملي كايشد شي واحد فيهم الكورة كايبقاو اللاعبين ديالو يدوروها فـ الدفاع ديالهم والمنتخب الآخر راجع للوراء، وحتى البينالتي اللي اعلن عليه الحكم لمصلحة سوريا فـ الشوط الثاني، تبين أنه ماشي بينالتي ملي رجع للفار وحيدو، واللي تفرج فـ الماتش غايقول بلي سوريا وفلسطين اتفاقو على التعادل.
وبالمقابل فـ الماتش الآخر اللي كان ملعوب فـ نفس الوقت بين تونس وقطر، سالا برباح المنتخب التونسي بنتيجة 3-0، ولكن هذه النتيجة ما كانتش كافية للتوانسة باش يتأهلو لربع النهائي، حيث مصيرهم كان مرتبط بالماتش ديال سوريا وفلسطين واللي سالا تعادل وهذا الشي ماشي فـ مصالحتهم.
وبهذه النتائج تأهل المنتخب الفلسطيني لربع نهائي كأس العرب كمتصدر للمجموعة الأولى وتأهل معه منتخب سوريا ثاني المجموعة بنفس الرصيد اللي هو 5 نقاط، أما تونس اللي جاو ثالثين برصيد 4 نقاط وقطر اللي حتلو المركز الأخير برصيد نقطة واحدة تقصاو من البطولة من دور المجموعات.