كود هناء ابو علي كازا ///
خالد سفير المدير العام لصندوق الإيداع والتدبير (سي دي جي) رجل الداخلية والوالي السابق لكازا دوز مرحلة فاشلة فهاد لمدينة. هادي يومين دار ندوة صحافية. اييه السيد بعد 3 سنين ديال الصمت خرج يهدر. طبعا ما قال حتى شي حاجة مفيدة.
سفير ردد تفاهات بحال نفي باللي “سي دي جي” “ماشي صندوق أسود”. وقال باللي كتخضع لرقابة صارمة وكتخدم بمنطق الشفافية والحكامة الرشيدة.
علاش قلنا تفاهات. هاد لكلام ديال كيس نوار راه تقالت فأواخر التسعينيات وبداية الألفية الجديدة، أيام “لوجورنال” و”تيل كيل” و”الصحيفة” وبعدها “نيشان”….. ما قالها حد اليوم باش تخرج تنفي.
ثم مشكلة سفير لكبيرة هو بغى يدير صمت الداخلية فمؤسسة كانت ديما معروف عليها التواصل. سنويا كانت ندوة صحافية باش يقدمو النتايج السنوية للمؤسسة. شكون عطاك الحق أنك توقف هاد الطريقة ديال التواصل. تعلم من والي بنك المغرب اللي عندو مؤسسة أهم من اللي عندك وأكثر حساسية وديما على تواصل. حتى رئيسك السابق الفعلي لفتيت عبد الوافي وزير الداخلية كيتواصل مع الرأي العام عن طريق البرلمان.
الدولة عطاتك 3 سنين ما تاخد والو حتى توقف على رجليك. طبعا تطلق مشاريع تتماشى مع السياسة لكبيرة ديال الدولة.
انت ما درتي والو. شوف مثلا المدينة الخضرا فبوسكورة. كان مشروع ثلاثي بين السي دي وجي والضحى” و”پالموري”. شفنا باللي غير السي دي جي عن طريق “سي جي اي” باعت عشرات الهكتارات لشركات اخرى. دليل على فشلكم وضعفكم.
ضعفكم بان فتدبير “مارينا” ديال كازا. ما كملتوش حتى البني. باقية گرية كبيرة عايشين فيها غير لكلاب وكيلوحو فيها هرگاوا الزبل وكيبولو فيها. هادي غير نماذج على طريقة تسييركم لهاد المؤسسة. غادي تگول راه المدينة الخضرا تباعت قبل ما يوصل للمنصب. راه مازال أراضي خاصها تبنى.
كيفاش تهدر على المونديال وانت ما مكملش اللي بديتيه هادي اكثر من عشر سنين.
عوض تطلق أرقام ما قادش عليها، كمل اللي بداتو هاد المؤسسة. باراكا ما تضحك على لمغاربة وتقول ياللي كتطمح لتعبئة 100 مليار درهم قبل 2030 وتوجه الاستثمارات لمجالات السيادة الوطنية مثل المياه، الطاقات المتجددة، الأمن الغذائي، والرقمنة. وا كمل غير اللي بدات شركات هاد “سي دي جي”.