كود ـ الرباط//
جاوب كاتب الدولة المكلف بالصناعة التقليدية لحسن السعدي اليوم فالبرلمان باللغة الأمازيغية على سؤال فريق التقدم والاشتراكية على الإكراهات لي كتعرفها الصناعة التقليدية ديال الفضة، وقال بلّي صناعة الفضة والحلي فالمغرب اكثر من حرفة، حيتاش هي جزء كبير من التراث ديال البلاد، هاد القطاع تطوّر بزاف فالسّنين الأخيرة، وكيخدم أكثر من 9200 صنايعية وصانع، وكيحقق رقم معاملات كيوصل لجوج مليار درهم، هاد الشي راجع للمجهود ديال الصناع اللي محافظين على اللمسة التقليدية وكيطوّروها بتصاميم جديدة وعصرية.
السعدي ذكّر بالندوة اللي تدارَت فـ16 يوليوز 2025 فمهرجان “تيميزار” بتزنيت، واللي حضروها مهنيين وخبراء وباحثين، هاد الندوة خرجات بعدّة توصيات مهمة: الحفاظ على التراث ديال الصياغة، تقوية التكوين، إدخال التقنيات الحديثة بحال التصميم بالحاسوب، وتشجيع الحرفيين يستعملو التجارة الإلكترونية، وزيد عليها تنظيم عملية التزوّد بالفضة وتسهيل الوصول لها، مع الترويج للمجوهرات المغربية فالسياحة والثقافة.
كاتب الدولة علن حتى على توقيع اتفاقية بين وزارات ومؤسسات مختلفة، الهدف ديالها فالقريب هو تنظيم السوق وتسهيل التزوّد بالفضة الخام بنقط جماعية، باش الحرفيين مايبقاوش يعانيو مع الغلاّ والفوضى فالمواد الأولية، وعلى المدى المتوسط، الهدف هو تحسين الجودة، دعم الاستثمار، تنظيم الضرائب والديوانة، وتطبيق القانون 50.17 بطريقة اللي كتعاون الحرفيين وتدمج القطاع فالسوق المهيكل.
وفيما يخص التكوين، قال لحسن السعدي إنه كاينين تخصّصات جديدة فمعاهد الصناعة التقليدية فتزنيت، إنزكان، الدار البيضاء وفاس، وكيوصل عدد المتدرّبين لأكثر من 400 شاب وشابة كل عام. وكاين حتى تكوين مستمر للصناع باش يطوّرو الكفاءات ديالهم. ومن جهة أخرى، تمّ الاعتراف ببعض “المْعلمين” ديال الدكـ الصويري وتاوكا فتزنيت كـ”كنوز حية”، باش ينقلو الخبرة ديالهم لجيل جديد، وفعلاً درّبو 23 شاب وشابة فبرنامج مدة ديالو تسعة شهور.